ۇلىستىڭ ۇلى كۇنى ءوز ەرەكشەلىگىمەن كەلدى

22 ناۋرىزدى بىرقاتار شىعىس حالقىمەن قوسا قازاق ەلى دە قۋانا قارسى الىپ ءجۇر. ال سونىڭ ىشىندە بيىلعى كوكتەمنىڭ, ياعني جاڭا جىلدىڭ ءۇش ءتۇرلى ەرەكشەلىگى بار ەكەنىن ايتقىمىز كەلەدى. ءبىرىنشى ەرەكشەلىگى – 60 جىل­دا ءبىر اينالىپ كەلەتىن اق قويان جىلىنىڭ كەزەگى بيىلعى كوك­تەم­نىڭ ەنشىسىندە, ەكىنشى ەرەكشەلىك – ەلىمىزدە كەزەكتەن تىس باس ساي­لاۋدىڭ ءوتۋى. بۇل – پرەزيدەنتتى تاڭ­داي­تىن, ياعني ەلدىڭ كەلەشەك تاع­دىرىن تاڭداپ, بەلگىلەنگەن ۇزاق جىلدىق باعىت-باعدارى­مىز­عا قول جەتكىزەتىن سايلاۋ. ءۇشىنشى ەرەكشەلىك – بيىل ءوز تىزگىنىمىزدى قولعا الىپ, كوك تۋى­مىزدى كو­تەر­گەنىمىزگە, تورقالى دا مەرەيلى, ءار جىلى عاسىرعا تاتيتىن تاۋەلسىزدىگىمىزگە 20 جىل تولعالى وتىر. جەر شارىنىڭ ءار بۇرىشىنا كوز سالساق, الۋان ءتۇرلى جاعداي­دى كورەمىز. تاياۋ شىعىس پەن اراب ەلدەرى جانە افريكا قۇر­لى­عىنداعى كەيبىر ەلدەر كەزىندە بىرىنەن كەيىن ءبىرى اڭساپ ءجۇرىپ ارەڭ قولدارى جەتكەن تاۋەلسىز­دىكتەرىن جارتى عاسىر وتەر-ءوت­پەستە تولىق تۇسىنە الماي, الەك­كە تۇسۋدە. ەكونوميكاسىن تۇراق­تى دامىتۋعا شامالارى كەلمەي, ءبىلىمىن, مادەنيەتىن جوعارى دەڭگەيگە جەتكىزۋگە كۇشتەرى جەتپەي, ۇلتتىق تابىستىڭ جان با­سىنا شاققانداعى تومەنگى ساتى­سىنان كوتەرىلە الماي, جوقشى­لىق پەن جۇمىسسىزدىقتان, قايىر­شىلىقتان ەڭسەلەرى تۇسۋدە. سونىمەن قاتار, دۇنيە ءجۇزىن­دەگى ەڭ حالقى كوپ جانە وركەندەپ وسكەن مەملەكەتتەردىڭ قاتارىندا ەسەپتەلەتىن قىتايدىڭ شەنسي پروۆينتسياسىندا ءالى تاۋدا, جارلاردا, ۇڭگىر ۇيلەردە جۇزدەگەن جىلدار بويى مىڭداعان ادامدار تۇرىپ, ومىرلەرىن وتكىزىپ جاتىر. ال ءۇندىس­تاندا ءۇي-جايلارى جوق كوپ ادامداردىڭ قوقىستاردىڭ ما­ڭىن­دا ءومىر وتكىزىپ جاتقان جاع­دايلارى بار, ولاردىڭ سول قال­دىق­تاردى جۋىپ, ساتىپ كۇندەلىكتى تاماعىن تاۋىپ ءجۇر­گەنى جا­سى­رىن ەمەس. ايتا بەرسەك, عارىش­تىق دامۋ جولىنا تۇسكەن جيىر­ما ءبىرىنشى عاسىردا دا اشار­شى­لىق, جوقشىلىق جاع­داي­دا ءومىر ءسۇرىپ جاتقان حالىقتار كوپ. ارينە, بۇل جەردە ءبىز ەشكىمدى تابالاپ وتىرعان جوقپىز, قايتا وسىنداي كەلەڭسىز, كەسىرى ۇلكەن بالەدەن اۋلاق بولۋدى ارقا­شان­دا ويىمىزدان شىعارماۋىمىز كەرەك. وسى كۇنىمىزگە شۇكىرشىلىك ايتا وتىرىپ, جيىرما جىلدىڭ ىشىندە ۇيىمشىلدىقپەن, شى­دام­دىلىقپەن, سابىرلىلىقپەن ەلى­مىزدە جۇيەلى دە ءتيىمدى ءوز­گە­رىستەر جاسالعانىن ءبىلۋىمىز كەرەك. بىزدە زاڭ شىعارۋشى, ات­قارۋ­شى جانە سوت بيلىگى تار­ماق­تارى قالىپتاسىپ, ۇلتتىق قاۋىپ­سىزدىك جۇيەسى مەن ۇلتتىق اسكەر قۇرىلىپ, ورنىقتى. دەمو­كرا­تيا­لىق جۇيەدە پرەزيدەنت ينس­تيتۋتى, قوس پالاتالى پارلامەنت, كوپ پارتيالىق جۇيە, قا­زاقستان حالقى اسسامبلەياسى سياق­تى بۇرىن بولماعان ازامات­تىق جانە ساياسي ينستيتۋتتار بەرىك قالىپتاستى. كورشى ەلدەرمەن اراداعى سىيلاستىق, ارىپتەستىك بايلانىستىڭ ارقاسىندا مەملەكەتتىك شەكارامىزدى بەكىتىپ ال­دىق. سونىڭ ناتيجەسىندە ءبىز بۇگىن الەۋمەتتىك سالادا دا, ادام مەن ادامزاتتىڭ قۇقىعى, ۇلتتىق قاۋىپسىزدىكتى ساقتاۋ باعىتىندا دا ازيا, افريكا, لاتىن امە­ريكاسى ەلدەرىنەن ءال­دە­قايدا كوش ىلگەرىمىز. اشار­شى­لىق, جوقشى­لىق­تان اۋلاقپىز, امانبىز. بۇگىنگى قازاقستاندى مويىن­دا­مايتىن, قۇرمەتتەمەيتىن ەل جوق دەسە بولادى. وسىنداي دەڭ­گەيگە كوتەرىلۋىمىزدىڭ باستى سەبەپتەرى بار. ول – ەكونوميكانىڭ ناقتى دامۋى, يندۋستريالىق-يننوۆاتسيالىق جولعا تۇسكەن قوعامنىڭ جاڭا تەحنولوگيا­لار­دى يگەرىپ, جان باسىنا شاق­قان­داعى ۇلتتىق تابىستى جوعارى مولشەرگە كوتەرە ءبىلۋى, ءبىلىم دەڭگەيىنىڭ ءوسۋى جانە ت.ب. ءبىزدىڭ ەلىمىزدىڭ وزىندىك تاڭ­داۋلى داڭعىل جولى بار. ول جاس مەملەكەتتەردىڭ مىنەزىندە سيرەك كەزدەسەتىن, ايقاي-شۋ شىعارماي, كورشى ەلدەرمەن ادەمى مامىلە جاع­دايىندا, قارىم-قاتىناستى قيىننان قيىستىرا ءبىلۋ دەپ اتا­لادى. اتا-بابالارىمىزدان مۇرا بولعان قانىمىزداعى تەكتىلىك, قىراعىلىق, تۇسىنىستىكپەن قارال­عان ديپلوماتيالىق مادەنيەتتىڭ دە كۇشى بار بويىمىزدا. قازاق قاي مەزگىلدە بولسا دا قىزىن كۇڭ, ۇلىن قۇل بولۋدان ساقتاپ, ەلىن-جەرىن جاۋعا بەرمەگەن, ەل اراسىندا شىققان داۋدى داناگوي قاريالارىمىز اقىلمەن شەشىپ, جونىنە سالعان. بۇگىنگى ۇستانى­مى­مىز دا ەلدىڭ بىرلىگى, ىنتى­ماعى مەن تاتۋلىعى وزىمىزگە بەلگىلى, ەلدىڭ ىرگە­تاسى بەرىك نىعايا بەرۋىنە نەگىز بولار­لىقتاي ەكونوميكالىق جاڭ­­عىرۋ, جاڭا الەۋمەتتىك ساياسات – ءبىلىم بەرۋ, دەنساۋلىق ساقتاۋ, مەملەكەتتىك ءتىلدى دامىتۋ, جۇ­مىس­پەن قامتۋدىڭ جاڭا جولى, تۇرعىن ءۇي, ساپالى اۋىز سۋ, ەل تابىسىن ارتتىرۋ ءما­سە­لە­لەرى جانە سوت, قۇقىق قورعاۋ جۇيە­­سىن­دەگى وزگەرىستەر تولىق قام­تىلىپ, الدىمىزعا ناقتى مىندەتتەر قوي­ىپ وتىرمىز. ەندى وسى قۇندى قۇجاتتارىمىزداعى كورسە­تىل­گەن باعىت-باعداردان, اتقاراتىن كەشەندى جوسپارلارىمىزدان اۋىت­قى­ماي, ەرىنبەي ەڭبەكتەنىپ, قوي ۇستىنە بوزتورعاي جۇمىرتقالايتىن ارمان كۇنىمىزدىڭ قادىرىن ارتتىرا بەرەيىك. قۇرمانعالي ءۋالي, ءماجىلىس دەپۋتاتى.