كاسىپكەرلەرگە قاتىستى 9 مىڭ سانيتارلىق تالاپ قىسقارتىلدى

"اتامەكەن" ۇلتتىق كاسىپكەرلەر پالاتاسى قوعامدىق مونيتورينگ جانە اكىمشىلىك كەدەرگىلەرمەن جۇمىس دەپارتامەنتىنىڭ ديرەكتورى ەربول وستەمىروۆتىڭ ايتۋىنشا, ەكى ايلىق رەۆيزيا بارىسىندا 40-تان استام سانيتارلىق ەرەجە تەكسەرىلدى. وندا 11 543 تالاپ بار. رەۆيزيانىڭ ناتيجەسىندە, تەكسەرىس قاعازدارىنان ول تالاپتاردىڭ 80 پايىزىن, ياعني 9 172-ءسىن الىپ تاستاۋ تۋرالى شەشىم شىعارىلدى. وسىلايشا, تەكسەرىس قاعازدارىندا 2 371 تالاپ قالدى. بۇل تۋرالى كاسىپكەرلەر قۇقىعىن قورعاۋ جانە سىبايلاس جەمقورلىققا قارسى ءىس-قيمىل كەڭەسىنىڭ بۇگىنگى وتىرىسىندا بەلگىلى بولدى. "ماسەلەن, تاماق ونىمدەرىنىڭ كوتەرمە جانە بولشەك ساۋداسىمەن اينالىساتىن ورىندارعا قاتىستى 207 سانيتارلىق تالاپ بولعان. سونىڭ 158-ءىن, ياعني 76 پايىزىن الىپ تاستاۋعا ۇسىنىس بەرىلدى. اتاپ ايتقاندا, بالىق جانە بالىق ونىمدەرىن ساقتاۋ ءۇشىن بولەك مۇزداتقىشتى ورناتۋ سياقتى تالاپتاردى الىپ تاستاپ وتىرمىز. سوسىن وندىرىستىك بولمەلەر مەن ىدىس-اياقتاردىڭ دەزينفەكتسياسىن باقىلاۋعا ىشكى تەكسەرىستىڭ ءوزى جەتىپ جاتىر. ال سىرتتان كەلگەن تەكسەرۋشى ىدىستاردان قاۋىپتى ءبىر ميكروفلورانى انىقتاسا, ءتيىستى شارانى قولدانا الادى. بۇدان بولەك, جانۋارلاردان الىناتىن شيكىزاتتان جاسالعان ونىمدەردى ۆەتەرينارلىق كۋالىكسىز ساتۋعا بولمايدى دەگەن تالاپتى الىپ تاستادى. سەبەبى دايىن ونىمگە ونداي قۇجات قاجەت ەمەس", - دەدى وستەمىروۆ.