2016 جىلى قازاقستاندىقتار 900 ملن دوللارعا كولىك ساتىپ الدى

2016 جىلدىڭ قاڭتار-جەلتوقسانىندا رەسمي ديلەرلەر 43 845 جەڭىل جانە جەڭىل كوممەرتسيالىق اۆتوكولىكتەردى وتكىزدى. بۇل 2015 جىلمەن سالىستىرعاندا 53,6 پايىزعا تومەن, دەپ حابارلادى قازاقپارات.  شەتەل ۆاليۋتاسىندا نارىق 869,9 ملن. اقش دوللارىن قۇرادى. بىلتىرعى قورىتىندى بويىنشا ساتىلعان 32 959 كولىك يمپورتقا, ال 10 886 ماشينا قازاقستاندىق اۆتوزاۋىتتاردىڭ ۇلەسىنە تيەسىلى. ەلىمىزدە سۇرانىسقا يە برەندتەردىڭ كوشىن «Toyota» باستاپ تۇر. ياعني ەسەپتى كەزەڭدە جاپوندىق 8 809 ماشينا وتكىزىلدى. «Lada» ديلەرلەرى 8 146 كولىك ساتسا, ۇشتىككە ەنىپ وتىرعان «Renault» كومپانياسىنىڭ 3 742 ءاۆتوموبيلى ءوز يەلەرىن تاپتى. مودەلدەر اراسىندا ءبىرىنشى ورىندا «Toyota Camry» تۇر. جاپوندىق سەداندى 3 148 مىڭ ساتىپ الۋشى قالاعان. سۇرانىسقا يە مودەلدەر بەستىگىنە  «Lada Priora» (2285 كولىك), «Lada 4x4» (2 221), «Lada Granta» (1883), سونداي-اق «Renault Duster» (1749)  ەنىپ تۇر. سونىمەن قاتار, قاڭتار-قازاندا جاڭا كولىكتى ساتىپ الۋ جاعىنان الماتى تۇرعىندارى بەلسەندىلىك (13155 اۆتوموبيل) تانىتقان. وسى رەتتە ەكىنشى ورىندا استانا (7740 ) بولسا,  ال ءۇشىنشى ورىننان اتىراۋ (3258) بايقالدى. اۆتوكولىك سالاسى كاسىپورىندارىنىڭ سالىقتىق تولەمى جىل ناتيجەسى بويىنشا 18,9 ملرد. تەڭگەنى قۇراپ, بۇل كورسەتكىش 2015 جىلعىدان 40 پايىزعا تومەندەۋ بولدى. بەلگىلى بولعانداي, ءتورتىنشى توقساننىڭ قورىتىندىسى بويىنشا اقشالاي ماندە نارىقتا ءوسىم بولدى, ياعني جەلتوقساندا ەل تۇرعىندارى كولىك ساتىپ الۋعا 293 ملن. دوللار جۇمسادى.