«قورعاس – شىعىس قاقپاسى» ايماعىنا بولىنگەن قارجى يگەرىلدى

«قورعاس – شىعىس قاقپاسى» ارنايى ەكونوميكالىق ايماعىنا بولىنگەن 36,8 ملرد تەڭگە تولىق يگەرىلدى. بۇل تۋرالى بۇگىن پارلامەنت ماجىلىسىندە يندۋستريالدىق جوبالاردىڭ قۇرىلىسىن باقىلاۋ كوميسسياسىنىڭ وتىرىسىندا «سامۇرىق-قازىنا» اق اتقارۋشى ديرەكتورى نۇرلان راحمەتوۆ مالىمدەدى, دەپ حابارلادى قازاقپارات. «رەسپۋبليكالىق بيۋدجەتتەن اتالمىش جوبانى جۇزەگە اسىرۋعا 36,8 ملرد تەڭگە بولىنگەن جانە ولاردىڭ بارلىعى ينفراقۇرىلىم قۇرىلىسىنا باعىتتالدى. قۇرلىقتىق پورت قتج كومپانياسىنىڭ قاراجاتى ەسەبىنەن قارجىلاندىرىلدى. ارنايى ەكونوميكالىق ايماقتىڭ ءوزى ءۇش بولىكتەن تۇرادى – قۇرلىقتىق پورت, لوگيستيكالىق ايماق جانە يندۋستريالدى ايماق. قازىرگى ۋاقىتتا «قورعاس – شىعىس قاقپاسى» ارنايى ەكونوميكالىق ايماعىنا بولىنگەن 36,8 ملرد تەڭگە قاراجات تولىق يگەرىلدى», – دەدى نۇرلان راحمەتوۆ. ونىڭ ايتۋىنشا, اەا ينفراقۇرىلىمىنىڭ جوسپارلانعان بارلىق 68 نىسانى پايدالانۋعا بەرىلدى. «بولىنگەن 36,8 ملرد تەڭگەنىڭ تەك 82,5 ملن تەڭگەسى قازىنادا قالىپ وتىر. ول ارنايى ەكونوميكالىق ايماقتى باسقارۋدىڭ اقپاراتتىق جۇيەسىن قۇرۋعا باعىتتالادى», – دەپ اتاپ ءوتتى ول. «سامۇرىق-قازىنا» اق اتقارۋشى ديرەكتورى بۇل جۇمىستار بيىل قاڭتار-اقپان ايلارىندا اياقتالاتىنىن ايتتى.