كوكتەمگى اسكەرگە شاقىرۋ باستالدى

3 ناۋرىزدا «بەلگىلەنگەن اسكەري قىزمەت مەرزىمىن وتكەرگەن مەرزىمدى اسكەري قىزمەتتەگى اسكەري قىزمەتشىلەردى زاپاسقا شىعارۋ جانە قا­زاق­ستان رەسپۋبليكاسىنىڭ ازاماتتارىن 2011 جىلدىڭ ءساۋىر-ماۋسىمىندا جانە قازان-جەلتوقسانىندا كەزەكتى مەرزىمدى اسكەري قىزمەتكە شاقىرۋ تۋرالى» قازاقستان رەسپۋبليكاسى پرەزيدەنتىنىڭ جارلىعى شىققان ەدى. وسىعان بايلانىستى الماتى قالاسى قورعانىس ىستەرى جونىندەگى دەپارتامەنتىندە وتكەن ەكى كۇندىك وقۋ-ادىستەمەلىك جيىنىندا بىل­تىر­عى جىلعى جاستاردى كۇزگى ءاس­كەرگە شاقىرۋ كەزەڭى قورىتىن­دى­لانىپ, تالداۋ جاسالدى. شاراعا قاتىسۋشىلارعا قر قم شبك ۇيىمداستىرۋ-جۇمىل­دىرۋ جۇمىستارى دەپارتامەن­تى­نىڭ باستىعى, پولكوۆنيك قايرات مىڭجانوۆ بيىلعى جىلعى كەزەكتى شاقىرىلىمعا تاپسىرما بەرىپ, اسكەري مىندەتتىلەردىڭ قۇجاتتا­رىن جاساۋ جانە وقۋ جيىندارىن ۇيىمداستىرۋدىڭ نەگىزگى تالاپ­تا­رىن جەتكىزدى. – جاستاردى قارۋلى كۇشتەر قاتارىنا ساپالى تۇردە ىرىكتەۋ قا­زاقستان ارمياسىنىڭ جاۋىن­گەر­لىك ازىرلىگىن جوعارى دەڭگەيگە كوتەرۋگە ىقپال ەتەدى, – دەپ اتاپ ءوتتى پولكوۆنيك قايرات مىڭ­جا­نوۆ. – وتكەن جىلدارداعى اسكەرگە شاقىرۋ ناۋقانىنىڭ ناتيجەسى كور­سەتىپ وتىرعانداي, ساپالى ءوت­كى­زىلگەن اسكەرگە شاقىرۋ ناۋقانى جاۋىنگەرلىك ازىرلىكتىڭ دە قار­قىندى وسۋىنە ءارى تيىمدىلىگىنە قول جەتكىزىپ وتىر. قازاقستان رەسپۋبليكاسىنىڭ قور­عانىس ءمينيسترى اسكەرگە شا­قى­رۋشىلاردىڭ ءبىلىم دەڭگەيىنىڭ ءوس­كەندىگىن بىرنەشە رەت اتاپ ءوت­كەن بولاتىن. وتكەن جىلى ءاس­كەرگە شا­قىرىلعانداردىڭ كوپ بولىگى جو­عارى ءبىلىمى بار جاستاردان قۇ­رال­دى. جيىنعا قاتىسۋشىلار اسكەري باسقارۋ ورگاندارى مەن جەرگىلىكتى اتقارۋ ورگاندارى اراسىنداعى ءوز­ا­را ءىس-قيمىلدى, دارىگەرلىك كوميس­سيالاردى قاجەتتى  مەديتسينالىق جاب­دىقتارمەن قامتاماسىز ەتۋدى, سونداي-اق  2011 جىلى اسكەري مىندەتتىلەرمەن وقۋ جيىندارىن ءوت­كىزۋ ماسەلەلەرىن تالقىلادى. داستان كەنجالين.