دانياردىڭ اكەسى ءارى جاتتىقتىرۋشىسى مارات ەلەۋسىنوۆتىڭ ايتۋىنشا ازىرگە كەلىسسوزدەر عانا جۇرگىزىلگەن, ال كەلىسىمشارتقا اقپان ايىندا قول قويىلادى. «كاسىپقوي بوكستا ءبارى باسقاشا. سپورتشى ءبىر عانا كەزدەسۋگە دايىندالادى. ءبىر تاۋلىك ىشىندە سالماعىن ولشەپ, قايتا قالپىنا كەلۋ جۇمىستارىمەن اينالىسادى. ال اۋەسقوي بوكستا تاڭەرتەڭگى ۋاقىتتا ءبىر رەت ولشەنسەڭ, كەشكە تامان جەكپە-جەك وتەدى. كاسىپقويدىڭ تاعى ءبىر ەرەكشىلىگى – ولشەۋدەن وتكەننەن كەيىن, ياعني كەزدەسۋدىڭ باستالۋىنا ءبىر-ەكى كۇن قالعاندا جەتى-سەگىز كيلوگرامم «تاستاۋ» ءۇشىن جاتتىعۋ جۇمىستارىمەن اينالىسادى. ال اۋەسقويدا بۇل مۇمكىن ەمەس جاعداي. ەندى الدا نە بولارىن ۋاقىت كورسەتەدى», – دەدى دانياردىڭ اكەسى.
ء«بىز ءالى ناقتى ءبىر سالماق دارەجەنى تاڭداعان جوقپىز. بىراق 66 كگ دۇرىس بولار دەپ توپشىلاپ وتىرمىز. مۇندا سپورتشىلار 80 كيلودان 69 كيلوعا دەيىن سالماعىن ازايتىپ جاتادى. سول ءۇشىن دانياردىڭ ۇيرەنشىكتى 69 كيلوسىن تاڭدامايمىز دەپ شەشتىك. جاتتىعۋ كەزىندە ول 72 كيلودا دايىندالادى», – دەدى مارات ەلەۋسىنوۆ. پروموۋتەرلىك كومپانيانى تاڭداۋدا MJA Entertainment's-كە ءتۇستى. «كەلىسىمشارت, سونداي-اق العاشقى جەكپە-جەك جايلى اشىپ ايتا المايمىز. ءبارى رەسمي تۇردە جۇزەگە اسقاننان كەيىن حابارلايتىن بولامىز. نەگىزى رەسەيدەن دە, اقش-تان دا ۇسىنىستار تۇسكەن. بىراق بۇل پروموۋتەرلىك كومپانيا بىزگە تيىمدىرەك جولدارىن ۇسىندى», – دەدى ول. دەبيۋتتىك كەزدەسۋىنىڭ الدىندا وعان ءوز ستيلىنە ايتارلىقتاي وزگەرىستەر ەنگىزۋ ۇسىنىلىپ وتىر. «دانيار جاڭا كەزەڭگە قادام باسايىن دەپ وتىر. كاسىپقوي ستيلگە كوشۋى ءۇشىن امەريكالىق جاتتىقتىرۋشىنىڭ قول استىندا جاتتىعادى», – دەدى. بارىمىزگە بەلگىلى دانياردىڭ اعاسى داۋرەن دە كاسىپقوي بوكستا ونەر كورسەتەدى. اكەسىنىڭ ايتۋىنشا, ول دا اتالعان پروموۋتەرلىك كومپانيامەن جۇمىس ىستەيدى.
«داۋرەن بۇرىنعى كومپانيامەن كەلىسىمشارتىن بۇزىپ, MJA Entertainment's-كە قوسىلدى. ارينە, ونىڭ ۇسىنىسى دانياردىكىمەن بىردەي ەمەس, بىراق بۇرىنعىسىنان جاقسىراق. قانشا دەگەنمەن, دانيار وليمپيادا چەمپيونى عوي», – دەدى مارات ەلەۋسىنوۆ. بۇعان دەيىن وليمپيادا چەمپيونى دانيار ەلەۋسىنوۆتىڭ كاسىپقوي بوكسقا اۋىسقاندىعى حابارلانعان. سونداي-اق, جاقىن ارادا ونىڭ قاتارىنا اسا اۋىر سالماقتا ونەر كورسەتەتىن يۆان دىچكو دا قوسىلۋى مۇمكىن.
