تۇراقتى وكىل سەنىم گراموتاسىن تاپسىردى

قازاقستان رەسپۋبليكاسىنىڭ بىرىككەن ۇلتتار ۇيىمى جانىنداعى تۇراقتى وكىلى قايرات وماروۆ وسى ۇيىمنىڭ باس حاتشىسى انتونيۋ گۋتەرريشكە سەنىم گراموتاسىن تاپسىردى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى. ءراسىم ۇيىمنىڭ نيۋ-يوركتەگى شتاب-پاتەرىندە ءوتتى. راسىمنەن كەيىن بولعان ەكىجاقتى سۇحبات بارىسىندا ق.وماروۆ پەن ا.گۋتەرريش جاڭا قىزمەتكە تاعايىندالۋلارىمەن ءبىرىن ءبىرى جىلى قۇتتىقتاپ, تاراپتار ارىپتەستىگىنىڭ ودان ءارى دە جوعا­رى قارقىنمەن داميتىندىعىنا سەنىم ءبىلدىردى. قازاقستاندىق ديپ­لومات ەلىمىزدىڭ باسشىلىعى اتىنان ۇيىم­نىڭ كيكىلجىڭدەردى بولدىرماۋ, بىتىمگەرشىلىك, بەيبىتشىلىك ورناتۋ مەن ۇزاق مەرزىمدى تۇراقتى دامۋ سالالارىنداعى كوپجاقتى باستامالارعا ىقپالداسۋ جونىندەگى جاڭا باسشىسىنىڭ جوسپارلارىن قولدايتىندىعىن ءبىلدىردى. سونىمەن قاتار, ول سۇحباتتاسىن قازاقستاننىڭ بۇۇ قاۋىپسىزدىك كەڭەسىندەگى با­سىم­دىقتارى جايلى حاباردار ەتىپ, ورتالىق ازيا ەلدەرى مەن اۋعانستاننىڭ الەۋ­مەتتىك-ەكونوميكالىق دامۋىنا جا­ھاندىق ۇيىمنىڭ يگى ىقپالدارىن جانداندىرۋدىڭ ماڭىزدىلىعى تۋرالى ايتتى. ءوز كەزەگىندە باس حاتشى ا.گۋ­تەر­ريش ن.نازارباەۆپەن 2016 جىل­عى 23 قاراشادا استانادا وتكەن كەز­دەسۋىن جىلىلىقپەن ەسكە الا وتىرىپ, قازاقستاننىڭ حالىقارالىق ساحناداعى جەتىستىكتەرىنە جوعارى باعا بەر­دى. سونىمەن قاتار, قازاقستاننىڭ الەمنىڭ بارلىق مەملەكەتتەرىمەن, سونىڭ ىشىندە قاۋىپسىزدىك كەڭەسىنىڭ بارلىق تۇراقتى مۇشەلەرىمەن تىعىز ىنتىماقتاستىق ورناتقان ەل رەتىندەگى بەدەلىن اتاپ ءوتتى. بۇۇ باسشىسىنىڭ ايتۋىنشا, بۇل جەتىستىكتەر ايماقتىق قاقتىعىستاردى رەتتەۋ مەن جاھاندىق قاۋىپسىزدىكتىڭ باستى ماسەلەلەرى بو­يىنشا قايشىلىقتاردى ەڭسەرۋگە يگى ىقپالىن تيگىزەدى. سوندىقتان دا بۇۇ قازاقستانمەن ساياسي ديالوگ پەن پراك­تيكالىق ىنتىماقتاستىقتى ودان ءارى كەڭەيتۋگە مۇددەلى, دەدى ءوزىنىڭ سوزىندە ا.گۋتەرريش.