تاريف كوتەرۋدى نەگىزسىز دەپ سانايدى

قاڭتار ايىنان باستاپ شىعىس قازاقستان وبلىسى بويىنشا ەلەكتر ەنەرگياسىنا تاريف 5,5 پايىزعا ءوستى. – ءبىزدىڭ وبلىس قازاقستان بويىنشا ءۇش گەس-ءى بار ءوڭىر بولىپ سانالادى, – دەيدى سەمەي قالاسىنداعى قوعامدىق كەڭەستىڭ توراعاسى نيكولاي يساەۆ. – سوندىق­تان دا اقىلعا سالىپ, ويلانىپ قاراساق, بىزدەگى ەلەكتر ەنەرگياسىنا دەگەن باعا وزگە وڭىرلەرگە قاراعاندا ارزان بولۋى كەرەك. گيدروەلەكترستانسالار ەڭ ارزان ەلەكتر ەنەرگياسىن وندىرەدى. بىراق, بۇقتىرما گەس-ءى «قازتسينك» جشس-ىنە بەرىلگەن. وسى گەس ەڭ ارزان ەلەكتر ەنەرگياسىن وندىرەدى. بۇل ءبىر, ەكىنشىدەن, بۇقتىرما گەس-ءى سەمەي وڭىرىنە ەكونوميكالىق جاعىنان دا, ەكولوگيالىق جاعىنان دا ءتيىمسىز ەكەندىگى راس. ەڭ كوپ سۋ تارتىلادى جانە توپىراققا تازارتىلعان زاتتار قالدىعى تۇسەدى. وسى  گەس-ءتىڭ ارقاسىندا, ياعني سۋدى كوپ تارتاتىندىقتان سەمەيدە كەمە قاتىناسى توقتاپ قالدى. قازىر وسى گەس-ءتى جەكەمەنشىككە العاندار ونىڭ ەلەكتر ەنەرگياسىنىڭ شامالى بولىگىن رەسەيگە ساتۋدا. ال وبلىس حالقى, سەمەي تۇرعىندارى جىل سايىن قىمباتتايتىن ەلەكتر ەنەرگياسىنىڭ اقشاسىن تولەۋگە ءماجبۇر, ال وزىمىزدە ەڭ ارزان ەلەكتر ەنەرگياسى بار ەكەندىگىن ەشكىم ەلەمەيدى. نيكولاي يساەۆ بۇل سوزدەرىن ءتاريفتى كوتەرۋگە بايلا­نىستى وتكەن جيىنداردا ۇنەمى ايتۋدان جالىق­قان ەمەس, بىراق اسا ءمان بەرىپ وتىرعان ەشكىم جوق. ال  ەلەكتر قۋاتىنىڭ قىمباتتاۋىن ەنەرگەتيكتەر «كەGوك» اق, شق اەك سىندى ءىرى مەكەمەلەرمەن بايلانىستىرۋدا. ماسەلەن, «كەGوك» اق ءتاريفتى ءوسىرۋدى الداعى بەس جىلعا بەكىتىپ قويعان. بەس جىل ىشىندە شامامەن ولاي-بىلاي ءوسۋى مۇمكىن دەگەن بولجامدار قوعامدىق تىڭداۋعا قاتىسقان تۇرعىنداردىڭ رەنىشىن تۋعىزدى. سوندىقتان دا, ەگەر «كەGوك» اق ءتاريفتى كوتەرۋدى زاڭدى تۇردە بەكىتىپ العان بولسا, «شىعىسەنەرگوترەيد» جشس تاراپىنان وتكىزىلىپ وتىرعان وسى قوعامدىق تىڭداۋ بوسقا ۋاقىت الۋ دەگەندى العا تارتتى. جانە جينالعاندار دەپۋتاتتارعا ساۋال جولداپ, ماسەلەنى زاڭ جۇزىندە رەتتەگەن ءجون دەستى. ءسويتىپ, سەمەي قالاسىندا ەلەكتر ەنەرگياسىن ساتۋ تاريفتەرىنە ارنالعان قوعامدىق تىڭداۋدا شىعىس قازاقستان وبلىسىن ەلەكتر ەنەرگياسىمەن قامتاماسىز ەتەتىن «شىعىسەنەرگوترەيد»  جشس ەندى بۇل قىزمەتتىڭ قۇنىن 5,51 پايىزعا ارتتىراتىندىقتارىن ايتتى. بيىلعى جىلى جەتىنشى رەت وتكىزىلىپ وتىرعان قوعامدىق تىڭداۋ وتىرىسىنا «شىعىسەنەرگوترەيد» جشس ديرەكتورىنىڭ ورىنباسارى مستيسلاۆ مارتەميانوۆ قاتىسىپ, بىلاي دەدى: – ەلەكتر قۋاتىنىڭ ءتاريفىن كوتەرۋگە ءماجبۇر بولىپ وتىرمىز. ويتكەنى, كاسىپورىننىڭ تۇراقتى جۇمىس جاساپ, ءاربىر تۇرعىنعا ەلەكتر قۋاتىن جەتكىزۋى ءۇشىن جارىق قۇنىن كوتەرۋگە تۋرا كەلىپ تۇر. سەبەبى,  «كەGوك» اق سىندى ەلەكتر قۋاتىن جەتكىزۋشى كومپانيالار ءتاريفتى ءوسىرىپ وتىر. جيىندا شقو بويىنشا تاريف رەسپۋبليكاداعى ەڭ ارزان تاريف دەگەن ماسەلە دە ايتىلدى. بىراق قوعامدىق كەڭەس مۇشەلەرى بۇل كوكەيگە قونىمدى ەمەس, حالىقتىڭ تۇرمىسىن دا ەسەپكە الۋ كەرەك دەيدى. راۋشان نۇعمانبەكوۆا, جۋرناليست سەمەي