• 11 قاڭتار, 2017

داۋرەن اباەۆ ۋاقىتشا تىركەۋ تۋرالى پىكىر ءبىلدىردى

290 رەت

كورسەتىلدى

2 مين

وقۋ ءۇشىن

Egemen Qazaqstan

قازاقستاننىڭ اقپارات جانە كوممۋنيكاتسيالار ءمينيسترى داۋرەن اباەۆ ەلدەگى قازىرگى وزەكتى ماسەلەنىڭ ءبىرى - ازاماتتاردى ۋاقىتشا قونىس ورنىندا تىركەۋ ماسەلەسىن جەڭىلدەتۋ باعىتىنداعى شارالار تۋرالى ايتتى. ول بۇل تۋرالى ءوزىنىڭ فەيسبۋكتەگى پاراقشاسىندا بىلاي دەپ جازدى: قىمباتتى دوستار, سوڭعى كۇندەرى ەڭ كوپ تالقىلانعان ماسەلەنىڭ ءبىرى ازاماتتاردى مىندەتتى تۇردە ۋاقىتشا تىركەۋ نورماسى بولعانى بەلگىلى. بۇل ماسەلەنىڭ قوعامدا قىزۋ تالقىلانىپ, مەمورگاندار تاراپىنا بىرقاتار سىن ايتىلۋىنا تۇسىنىستىكپەن قاراۋعا بولادى. وكىنىشكە قاراي, كەيبىر قاجەتتى شارالاردىڭ دەر كەزىندە اتقارىلماۋى كورىنىس تاپتى. ارينە, زاڭ قابىلدانعان سوڭ, ونىڭ جۇزەگە اسۋى شارت. ەندىگى جەردە باستى مىندەتىمىز – ازاماتتاردىڭ تىركەۋدەن وتۋىنە بارىنشا قولايلى جاعداي جاساۋ. مىنە, وسى ماقساتتا ءبىز حقكو-لار قىزمەتكەرلەرىنىڭ جۇمىس كۇنىن ۇزارتتىق. بۇعان قوسا, ولار ازاماتتاردى دەمالىس كۇندەرىندە دە, ياعني 7-8 قاڭتاردا دا قابىلدادى. ارينە, اتالعان شارا ەڭبەك زاڭناماسى ساقتالا وتىرىپ, جۇزەگە اسىرىلدى. سونىمەن قاتار, وپەراتسيا زالدارىندا كوشى-قون پوليتسياسى قىزمەتكەرلەرىنە ارنالعان جۇمىس ورىندارى كوبەيتىلىپ, حقكو قىزمەتكەرلەرىنىڭ اۋىسىم گرافيگىنە وزگەرتۋلەر ەنگىزىلدى. 9 قاڭتاردان باستاپ ازاماتتاردى جىلجىمايتىن مۇلكىنىڭ ورنالاسقان ورنىنا قاراماستان تىركەۋ مۇمكىندىگى قاراستىرىلۋدا. حالىق تىعىز ورنالاسقان الماتى مەن شىمكەنت قالالارىنا ءموبيلدى حقكو-لار جىبەرىلدى. ولار اسكەري بولىمدەر مەن تۇرعىن سانى كوپ اۋدانداردى قىزمەتپەن قامتاماسىز ەتۋدە. تىركەۋگە قاتىستى بارلىق سۇراقتارىڭىزدىڭ جاۋابىن بىرىڭعاي بايلانىس ورتالىعىنىڭ 1414 ءنومىرى ارقىلى الۋلارىڭىزعا بولادى. ارينە, ءالى دە بىرقاتار ماسەلەلەردىڭ بار ەكەنى راس, ولاردى جاقىن ۋاقىتتا رەتتەۋ كوزدەلۋدە. ەڭ الدىمەن, شامامەن ءبىر اي ىشىندە «ونلاين» رەجيمىندە تىركەلۋ مۇمكىندىگى قولجەتىمدى بولماق. سونىمەن بىرگە, ازاماتتاردان مىندەتى تۇردە 2-فورما بويىنشا (جىلجىمايتىن م ۇلىككە قۇقىق تۋرالى) انىقتامانى تالاپ ەتۋدى الىپ تاستاۋ جوسپارلانۋدا. بۇل تىركەلۋ پروتسەسىن 2 ەسەگە دەيىن ازايتار ەدى. مينيسترلىك حقكو-لاردىڭ مالىمەتتەر بازاسىنا اكىمدىكتەردىڭ قولجەتىمدىلىگىن قامتاماسىز ەتۋدى ۇسىنىپ وتىر. بۇل اكىمدىكتە جاردەماقى راسىمدەۋشى ازاماتتاردىڭ قاجەتتى انىقتامالاردى سول جەردەن الۋىنا مۇمكىندىك بەرمەك. وسى قادام حقكو-لار جۇكتەمەسىن ازايتاتىنى انىق. ءسوز سوڭىندا, ءبىز ازاماتتاردى قالىپتاسقان جاعدايعا تۇسىنىستىكپەن قاراۋعا شاقىرامىز. ال, مينيسترلىك ءوز تاراپىنان ماسەلەلەردىڭ رەتتەلۋىنە كۇش سالاتىن بولادى.