اندرە روزە: دجەيكوبستىڭ جەڭىسىنە سەنىمدىمىن

WBA نۇسقاسى بويىنشا ورتا سالماقتا الەم چەمپيونى دەننيەل دجەيكوبستىڭ (32-1, 29 كو) جاتتىقتىرۋشىسى اندرە روزە WBA (Super), IBO, WBC جانە IBF بەلبەۋلەرىنىڭ يەسى قازاقستاندىق گەننادي گولوۆكين (36-0, 33 كو) جايلى ءوز پىكىرىمەن ءبولىستى. بۇل تۋرالى vesti.kz حابارلادى. «دەننيدى تۋعان ۇلىمداي جاقسى كورەمىن. ومىرىندە تالاي قيىندىقتى كورگەن. ىسىك دەرتىمەن اۋىرىپ, ەمدەلىپ شىقتى. ال 18 ناۋرىزدا رينگكە شىعىپ, وزىنە سەنىم ارتپاعاندارعا ءبارىن دالەلدەيتىنىنە سەنىمدىمىن. وعان دەيىن ءبىز تىڭعىلىقتى دايىندالامىز. گولوۆكينگە جانكۇيەرلىك ەتەتىن كەزدەرىم دە بار. ول وتە قاراپايىم ادام. بىراق قارسىلاسىمىز ەكەنىن ۇمىتپاۋىمىز قاجەت», – دەدى روزە. «ءبىرىنشى كەزەكتە دجەيكوبستىڭ ادامگەرشىلىگىنە العىسىمدى بىلدىرگىم كەلەدى. GGG-مەن جۇدىرىقتاساتىنى بەلگىلى بولعاننان كەيىن ناعىز چەمپيوندار سەكىلدى پىكىرىن ءبىلدىردى. ال جەكپە-جەككە كەلەر بولساق, 90 پايىزعا بىرەۋى نوكاۋتپەن ۇتادى دەپ سەنىمدى تۇردە بولجام جاساۋعا بولادى. اندرە ەكەۋىمىز ورتا سالماقتاعى بوكس ءۇشىن بۇل كەزدەسۋدىڭ قانشالىقتى ماڭىزدى ەكەنىن بىلەمىز دەگەن ويدامىن», – دەدى ابەل سانچەس. ايتا كەتەيىك, گولوۆكين مەن دجەيكوبس اراسىنداعى ايقاس 18 ناۋرىز كۇنى نيۋ-يورك قالاسىنداعى Madison Square Garden ارەناسىندا وتەدى. ەلىمىزدە بۇل جەكپە-جەكتى «قازاقستان» جانە «قازسپورت» تەلەارنالارى كورسەتەدى.