اققۋلار نەگە ءولىپ جاتىر؟

ماڭعىستاۋدا قىسپەن بىرگە كەلەتىن قىزىق بار, ول – كاسپي باۋىرىنا اقشاڭقان اققۋلاردىڭ ۇشىپ كەلۋى. بۇل – قالا تۇرعىندارى مەن قوناقتارىنىڭ ساعىنا كۇتىپ, قۋانا قارسى الاتىن ناعىز جاڭالىقتى ءساتى. قويۋ كوك تەڭىز ۇستىنە ءسان بەرگەن ءيىر مويىندى ادەمى اققۋلاردى ۇزاق قىزىقتاپ, مۇمكىندىگىنە قاراي سۋرەتكە ءتۇسىپ, ولاردى جاعالاۋدان تاماقتاندىراتىن تۇرعىنداردىڭ كيەلى قۇسقا قۇرمەتى بولەك. بىراق, قالا تۇرعىندارى اقتاۋ قالاسىنىڭ حالىق تەڭىز جاعالاۋىنا ەڭ كوپ باراتىن تۇسى – 14 شاعىن اۋدانداعى جاعادان ءولى اققۋلاردى تاپقان. اققۋدىڭ ءبىرىنىڭ جانسىز دەنەسى تەڭىز جاعاسىنداعى تاس ۇستىندە جاتسا, ەكىنشىسى جاعالاۋدان ونشا قاشىق ەمەس سۋ ىشىندە جاتقان. اققۋلار نەدەن ءولدى, ولاردىڭ ولىمىنە نە سەبەپ؟ ماسەلە ءالى انىقتالعان جوق. تۇرعىندار اققۋلاردى نانمەن عانا تاماقتاندىراتىن. الايدا, 2014 جىلى «ەكو ماڭعىس­تاۋ» ۇكىمەتتىك ەمەس ۇيىمى اتال­عان قۇستارعا نان بەرۋگە بولمايتىندىعى, ناننىڭ ولاردىڭ اسقازانىنا اۋىرلىق تۇسىرەتىنى تۋرالى ەسكەرتىپ, تەڭىز جاعاسىنداعى ادام كوپ شوعىرلاناتىن ورىن­دار­عا ەسكەرتپە تاقتايلار ىلگەن بولا­­تىن. بۇل ەسكەرتپە حالىق ارا­سىن­­دا ءارتۇرلى پىكىر تۋدىردى – قول­­دا­­عان­­دار دا, قارسى شىققاندار دا بولدى. دەمالۋشىلاردىڭ تەڭىز جاعاسىنا قالدىرىپ كەتەتىن قوقىس-قالدىقتارى قۇس تورەسى – اققۋعا وڭ اسەر ەتپەيتىن سەكىلدى. قالاي بولعاندا دا, اققۋدىڭ اقتاۋعا جىلداعىداي كوپ ەمەس, جىل ساناپ سيرەكتەۋ كەلەتىنى كوڭىل مازالايدى. اقتاۋدان اققۋلار نەگە جەرىندى؟!. گۇلايىم شىنتەمىرقىزى, «ەگەمەن قازاقستان» ماڭعىستاۋ وبلىسى