«مورج» جەمگە شومىلادى

سوڭعى ون جىلدان بەرى جارىلقاسىن بايجانوۆ دەگەن ازامات جەم وزەنىنە شومىلادى. جىلدىڭ جىلى مەزگىلى ەمەس, قاقاعان قىستا دا وزەن سۋىنا ءبىر شومىلماي, ىشكەن اسى بويىنا باتپايدى. ءوزىنىڭ ايتۋىنشا, ارينە, بىردەن وزەننەن ۇكى ويىپ, سالقىندىعى دەنە قاريتىن سۋعا سۇڭگىمەگەن. الدىمەن, قىس ايلارىندا دەنەسىنە شەلەكپەن مۇزداي سۋ قۇيعان. كەيىننەن قارعا اۋناپ, دەنەسىن اق ۇلپامەن ىسقىلاعان. وسىلايشا, اعزاسىن سالقىن سۋعا ۇيرەتكەن. – قازىر جاسىم 60-تا, – دەيدى جىلىوي اۋدانىنىڭ شوقپارتوعاي اۋىلىندا تۇراتىن جارىلقاسىن بايجانوۆ. – قىس بويى وزەن ۇستىندە جالاڭاياق جۇرەمىن. مۇز ارالاسقان سۋعا شومىلامىن. كەشكى 6-دان كەيىن تويا تاماق ىشپەيمىن. سالقىن سۋعا شومىلعانىمنىڭ ناتيجەسىندە دەنساۋلىعىم ويداعىداي. قان قىسىمىم تۇراقتى, بىردە-ءبىر سىرقاتىم جوق. وسىنىڭ ءبارى الدىمەن, ءوزىمنىڭ دەنساۋلىعىم­دى ساقتاپ, اۋىرماۋىم ءۇشىن قاجەت. ەكىنشىدەن, جاستار­دىڭ سالاماتتى ءومىر سالتىن قالاۋىنا جول كورسەتكىم كەلدى. ونىڭ ايتۋىنشا, قازىرگى جاس جىگىتتەردىڭ اراسىندا سۋىققا شىداي الماي, ءتۇرلى سىرقاتتارعا شالدىعاتىندار كوبەيىپ بارادى. مۇنىڭ باستى سەبەبىن ولاردىڭ دەنەسىن سالقىن سۋمەن شىنىقتىرۋعا ءمان بەرمەۋىنەن كورەدى. ال ءوزى قىستىڭ ۇسكىرىك ايازىندا وزەنگە شومىلۋدى سپورت­تىڭ ءبىر تۇرىنە جاتقىزادى. سودان بولسا كەرەك, ونى اۋىلداس­تارى «مورج» دەپ اتايدى.  جولداسبەك شوپەعۇل, «ەگەمەن قازاقستان»  اتىراۋ وبلىسى