بۇۇ قاۋىپسىزدىك كەڭەسىنىڭ پىكىرتالاستارىندا قازاقستان پرەزيدەنتىنىڭ ساياسي ۇندەۋى تانىستىرىلدى
2017 جىلعى 10 قاڭتاردا قازاقستان العاش رەت بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە ونىڭ «شيەلەنىستەردىڭ الدىن الۋ جانە بەيبىتشىلىكتى ساقتاۋ» تاقىرىبىنداعى اشىق پىكىرتالاستارىنا قاتىستى, وسى پىكىرتالاستار اياسىندا قازاقستاننىڭ سىرتقى ىستەر ءمينيسترى قايرات ءابدىراحمانوۆ پرەزيدەنت نۇرسۇلتان نازارباەۆتىڭ «قاۋىپسىز, ءادىل جانە وركەندەگەن الەم قۇرۋ ءۇشىن جاھاندىق ارىپتەستىكتى نىعايتۋعا قازاقستاندىق تۇجىرىمدامالىق كوزقاراس» اتتى ساياسي ۇندەۋىن تانىستىرىپ ءوتتى.
نيۋ-يورك قالاسىندا ءوتكەن شاراعا بۇۇ باس حاتشىسى انتونيۋ گۋتەرريش, ۇلىبريتانيا, يتاليا, لاتۆيا, پولشا, فرانتسيا, نيدەرلاند, ۋكراينا, شۆەتسيا, ەفيوپيا جانە جاپونيانىڭ سىرتقى ساياسات ۆەدومستۆولارىنىڭ باسشىلارى جانە سىرتقى ىستەر مينيسترلەرىنىڭ ورىنباسارلارى, رەسەي, قىتاي, اقش جانە بۇۇ-عا مۇشە باسقا دا مەملەكەتتەردىڭ بۇۇ جانىنداعى تۇراقتى وكىلدەرى قاتىستى.
قاۋىپسىزدىك كەڭەسىنىڭ ءمۇشەلەرى جانە بۇۇ ەلدەرىنىڭ وكىلدەرى پىكىرتالاستار بارىسىندا شيەلەنىستەردىڭ الدىن الۋ جانە بەيبىتشىلىكتى ساقتاۋ سالاسىنداعى وزدەرىنىڭ ۇلتتىق باسىمدىقتارى تۋرالى ءمالىمدەدى, سونداي-اق بۇكىلالەمدىك ۇيىم قىزمەتىنىڭ وسى باسىمدىقتى باعىتتارى بويىنشا جاڭا باس حاتشىنىڭ جۇمىسىنا قولداۋ ءبىلدىردى.
پىكىرتالاستار بارىسىندا قازاقستاننىڭ سىرتقى ىستەر ءمينيسترى 2017-2018 جىلدار كەزەڭىندە قاۋىپسىزدىك كەڭەسىنىڭ تۇراقتى ەمەس مۇشەسى رەتىندەگى قازاقستان وكىلەتتىكتەرىنىڭ باستالۋىنا وراي مەملەكەت باسشىسىنىڭ ساياسي ۇندەۋىن جاريالادى.
ق.ءابدىراحمانوۆ بۇل ءۇندەۋدىڭ مەملەكەت باسشىسىنىڭ 2016 جىلعى 31 ناۋرىزداعى «الەم. ءححى عاسىر» مانيفەسىنىڭ قاعيداتتارىنا نەگىزدەلەتىندىگىن جانە ونى شىعارماشىلىق تۇرعىدان دامىتاتىندىعىن اتاپ كورسەتتى. پرەزيدەنت ن.نازارباەۆتىڭ يادرولىق قاۋىپسىزدىك جونىندەگى IV سامميت اياسىندا ۇسىنىلعان باعدارلامالىق قۇجاتىنىڭ بۇۇ-نىڭ 100 جىلدىق مەرەيتويىنا قارسى يادرولىق قارۋسىز الەم قۇرۋ ماقساتىندا حالىقارالىق بەيبىتشىلىك پەن قاۋىپسىزدىكتى نىعايتۋ, سونداي-اق بەيبىتشىلىك, قاۋىپسىزدىك جانە دامۋ اراسىنداعى اجىراماس بايلانىستى قامتاماسىز ەتە وتىرىپ, عالامشاردى سوعىستار مەن شيەلەنىستەردەن ارىلتۋ ىسىندە كۇش-ءجىگەردى بىرىكتىرۋ جانە ىنتىماقتاسۋ قاجەتتىگىنە باسا نازار اۋدارعاندىعى بەلگىلى.
ۇندەۋدە اتاپ كورسەتىلگەندەي, «قازاقستان كەڭەستە بەيبىتشىلىك پەن قاۋىپسىزدىكتى ساقتاۋ مەن نىعايتۋدىڭ ءبىرىنشى كەزەكتەگى ماڭىزدىلىعىن نەگىزگە الا وتىرىپ, ونىڭ بۇكىل كۇن ءتارتىبى بويىنشا ءادىل جانە اشىق جۇمىس ىستەيتىن بولادى». ن.نازارباەۆتىڭ ايتۋىنشا, استانا «قاۋىپسىزدىك كەڭەسىنىڭ بارلىق مۇشەلەرىمەن تەڭ قۇقىلى نەگىزدە ىنتىماقتاسا جۇمىس ىستەۋگە, حالىقارالىق بەيبىتشىلىك پەن قاۋىپسىزدىكتى نىعايتۋ ماقساتىندا ىمىراعا قول جەتكىزىپ, باتۋالاستىقتىڭ قالىپتاسۋىنا سەپتىگىن تيگىزۋگە نيەتتى».
وسىعان وراي, ۇندەۋدە بۇۇ قك تۇراقتى ەمەس مۇشەسى رەتىندەگى قازاقستان جۇمىسىنىڭ باسىمدىقتارى اتاپ كورسەتىلدى. ولاردىڭ قاتارىندا يادرولىق قارۋسىز الەمدى جاقىنداتۋ, جاھاندىق سوعىس قاتەرىن بولدىرماۋ, اۋعانستانداعى بەيبىتشىلىككە ىقپالداسۋ, ورتالىق ازيادا بەيبىتشىلىكتىڭ ءوڭىرلىك ايماعىن قالىپتاستىرۋ, بۇۇ قامقورلىعىمەن جاھاندىق لاڭكەستىككە قارسى كواليتسيا (جەلى) قۇرۋ, افريكانىڭ بەيبىت دامۋىنا ءجاردەمدەسۋ, بۇۇ-نىڭ ورنىقتى دامۋ ماقساتتارىن, بەيبىتشىلىك, قاۋىپسىزدىك جانە دامۋ اراسىنداعى اجىراماس بايلانىستى ىلگەرىلەتۋ, بۇۇ-نى ءححى عاسىر تالاپتارىنا بەيىمدەۋ جانە جاھاندىق پروبلەمالاردى شەشۋ ءۇشىن ۇجىمدىق ساياسي ەرىك-جىگەردى نىعايتۋ ماقساتىندا مەملەكەتتەر مەن ۇكىمەتتەر باسشىلارى دەڭگەيىندە قك-گە مۇشە مەملەكەتتەردىڭ تۇراقتى كەزدەسۋلەر تەتىگىن كەلىسۋ بار.
مەملەكەت باسشىسى ءوز ۇندەۋىندە اتاپ كورسەتكەندەي, «قازاقستان كەڭەستە بارلىق مۇشە ەلدەرمەن اتالعان باسىمدىقتى باعىتتار بويىنشا اشىق, ءادىل جانە ساياسي جاعداياتسىز, جاۋاپتى, سالماقتى جانە سىندارلى تۇردە جۇمىس ىستەۋگە نيەتتى».
وسىعان وراي, قۇجاتتا «قازاقستاننىڭ ماڭىزدى ماقساتقا – ءححى عاسىردا الەمدى قاۋىپسىز, ءادىل جانە وركەندەگەن الەمگە اينالدىرۋ ماقساتىنا قول جەتكىزۋ جونىندەگى ءوز باستامالارىنا ارىپتەستەرىنىڭ تاراپىنان قولداۋ كورسەتىلەتىندىگىنە سەنىم بىلدىرەتىندىگى» ايتىلادى.
قازاقستاندىق تاراپ سونداي-اق, پىكىرتالاس قاتىسۋشىلارىنىڭ نازارىن پرەۆەنتيۆتى ديپلوماتياداعى, سەنىم شارالارىن ىلگەرىلەتۋ مەن نىعايتۋداعى, جاپپاي قىرىپ-جويۋ قارۋلارىن تاراتپاۋداعى, داۋ-جانجالداردى رەتتەۋدەگى جانە حالىقارالىق لاڭكەستىككە قارسى ارەكەت ەتۋدەگى بىرلەسكەن كۇش-جىگەردىڭ ماڭىزدىلىعىنا اۋداردى. قازاقستان باسشىلىعىنىڭ استانادا سيريادا بەيبىتشىلىك ورناتۋ بويىنشا كەلىسسوزدەر الاڭىن ۇسىنۋعا دايىن ەكەندىگى تاعى دا اتاپ كورسەتىلدى.
قازاقستان پرەزيدەنتىنىڭ ۇندەۋى وتىرىس قاتىسۋشىلارىنىڭ جوعارى باعاسىنا يە بولدى. بۇدان باسقا, ونى بۇۇ قك رەسمي قۇجاتى رەتىندە تىركەۋ تۋرالى شەشىم قابىلداندى.
نيۋ-يورككە ساپارى بارىسىندا ق.ءابدىراحمانوۆتىڭ بۇۇ باس حاتشىسى ا.گۋتەرريشپەن كەزدەسۋى بولىپ ءوتتى. كەزدەسۋ بارىسىندا استانانىڭ قاۋىپسىزدىك كەڭەسىنە مۇشەلىگى باعدارلاماسىنىڭ وزەكتى ماسەلەلەرى مەن قازاقستان مەن بۇۇ ىنتىماقتاستىعىنىڭ كوپ قىرلى كۇن ءتارتىبى تالقىلاندى.
