ءماجىلىس دەپۋتاتتارى بقو-دا بولدى

ءماجىلىس دەپۋتاتتارى گۇلجان قاراعۇسوۆا, تاتيانا ياكوۆلەۆا جانە امانجان جامالوۆ بقو-عا جۇمىس ساپارى كەزىندە زەلەنوۆ اۋدانى اكتيۆىمەن, سونداي-اق ورال قالاسىندا «كۆانت» جشس ۇجىمىمەن كەزدەستى, دەپ حابارلايدى قازاقپارات. دەپۋتاتتار زەلەنوۆ اۋدانى ورتالىعى پەرەمەتنىي اۋىلىنداعى دوستىق ۇيىندە بولىپ, وسىنداعى ەتنومادەني بىرلەستىكتەردىڭ جۇمىسىمەن تانىستى. اكتيۆ جيىنىندا اۋدان اكىمى كارىم جاقىپوۆ استىقتى ءارى ءوندىرىستى ءوڭىردىڭ الەۋمەتتىك-ەكونوميكالىق دامۋىنا توقتالدى. ءماجىلىس دەپۋتاتتارى ەلباسى باستاماسىمەن قولعا الىنعان مەملەكەتتىك باعدارلامالاردىڭ ورىندالۋ بارىسى تۋرالى اڭگىمەلەپ, تۇرعىنداردىڭ ساۋالدارىنا جاۋاپ بەردى. دەپۋتاتتار گ.قاراعۇسوۆا, ا.جامالوۆ, ت.ياكوۆلەۆا سونداي-اق وڭىرگە تانىمال جيھاز شىعارۋمەن اينالىساتىن «كۆانت» جشس قىزمەتكەرلەرىمەن كەزدەسىپ, ولاردىڭ دا ۇسىنىس-پىكىرلەرىنە دەن قويدى. ءماجىلىس دەپۋتاتى امانجان جامالوۆتىڭ اتاپ وتكەنىندەي, ەلباسىمىز شاعىن جانە ورتا كاسىپكەرلىككە قولداۋ كورسەتۋمەن بىرگە ولار وندىرەتىن ءونىم كولەمىن كوبەيتۋ مىندەتىن قويعانى بەلگىلى. ەگەر ەل ەكونوميكاسىنداعى شاعىن جانە ورتا كاسىپكەرلىك ۇلەسى مولايسا, تۇسەتىن سالىق تا ارتادى. ەڭ باستىسى, كاسىپورىندار جاڭا تەحنولوگيا نەگىزىندە ءوندىرىس تۇراقتىلىعى مەن ءوز جۇمىس الەۋەتىن ساقتاي وتىرىپ, حالىققا قاجەتتى, ساپالى ءونىم وندىرۋگە باعىت ۇستاۋى ءتيىس. «اۋداندار مەن ورال قالاسىنداعى كەزدەسۋلەر كەزىندە ايتىلعان قۇندى ۇسىنىس-پىكىرلەر ۇكىمەتكە دەيىن جەتكىزىلىپ, جۇمىس بارىسىندا ەسكەرىلەتىن بولادى», - دەدى ا.جامالوۆ.