الماتى تۇرعىنى جولسىزبەن جۇرەتىن كولىك قۇراستىرىپ الدى

الماتىلىق ماكسيم داۆىدوۆ كومانداسىمەن بىرگە ءوزىنىڭ جەرتولەسىندە جولسىزبەن جۇرەتىن كولىك قۇراستىردى, - دەپ حابارلايدى Tengrinews.kz. قۇراستىرۋشىلار ءوز تۋىندىسىن "ياششەر" (كەسىرتكە) دەپ اتاپتى. "كەمەگە قانداي ات قويساڭ, سولاي جۇزەدى" دەپ جاتادى. ءبىزدىڭ كولىك قارمەن, لايمەن جانە ءتۇز دالادا جۇرۋگە ارنالعان. ءبىزدىڭ كومپانيا مۇنايگاز قۇبىرلارىن قاداعالاۋمەن اينالىسادى, ال مۇندايدا نەشە ءتۇرلىسى بولادى, مۇناي دا توگىلۋى مۇمكىن. وسىنداي جاعدايلاردا ادەتتەگى كولىكتىڭ ءوتۋى قيىن جەرلەرگە دە اتتانۋ كەرەك بولادى. بۇل ءۇشىن ارنايى تەحنيكا قاجەت. ءبىز ءتۇرلى تەحنيكا قاراپ كوردىك, بىراق تىم قىمبات بولدى. ال ءبىزدىڭ كولىك 5,5 ميلليون تەڭگەگە ءتۇستى", - دەيدى داۆىدوۆ. "ياششەردى" قۇراستىرعان كەزدە قوسالقى سايماندار رەتىندە رەسەيلىك كولىك قۇراستىرۋشىلاردىڭ ونىمدەرى پايدالانىلعان. قۇراستىرۋشىلاردىڭ سوزىنشە, ىستەن شىققان جاعدايدا ولاردى تابۋ وڭاي بولادى. كولىك قوزعالتقىشىنىڭ كولەمى 1,5 ليتر. بۇل كولىكتى جاساۋعا توعىز اي كەتكەن. "ەڭ باسىندا بۇل جوبامەن ءتورت ادام اينالىسقان. ارينە, كۇمان بولدى, بىراق ءىستىڭ ناتيجەسى كورىنە باستاعاندا سەنىمدىلىك پايدا بولدى. قاڭقاسىن جەرتولەدە جيناپ, سول جەردە بەكىتتىك. نەگىزگى بولشەكتەرىن دالادا, شاتىر استىندا جيناستىردىق", - دەيدى الماتىلىق.