استانادا ەكسپو-2017 قارساڭىندا 23 قوناقۇي پايدالانۋعا بەرىلەدى

بۇگىنگى كۇنى استانادا 12 482 ورىنعا ارنالعان 164 قوناق ءۇي بار. ەكسپو-2017 وتكىزىلەتىن كەزەڭدە 2 829 ورىنعا ەسەپتەلگەن تاعى 23 قوناق ءۇي كەشەنىن پايدالانۋعا بەرۋ جوسپارلانىپ وتىر. سونىمەن قاتار, قالادا 664 ورىنعا ارنالعان 25 حوستەل جۇمىس ىستەيدى. 2017 جىلدىڭ مامىر ايىنا دەيىن قوناق ۇيلەر مەن حوستەلدەردە 15 975 ورىن دايىنداۋ كوزدەلگەن, دەپ حابارلادى abctv.kz استانا اكىمدىگىنىڭ ءباسپاسوز قىزمەتىنە سىلتەمە جاساپ. قالا اكىمدىگى قوناقتاردى ورنالاستىرۋدىڭ قوسىمشا ورىندارى رەتىندە جوعارى وقۋ ورىندارى مەن كوللەدجدەردىڭ جاتاقحانالارى, جالعا بەرىلەتىن پاتەرلەردى قاراستىرىپ وتىر. بۇگىنگى كۇنى 1 710 ورىندىق 10 كوللەدج جاتاقحاناسى ازىرلەندى, ولار رەسپۋبليكا وڭىرلەرىنەن كەلەتىن 40 000 وقۋشىنى ورنالاستىرۋعا مۇمكىندىك بەرەدى. 2017 جىلدىڭ مامىرىنا قاراي جاتاقحانالاردا 9 000 ورىن دايىنداۋ جوسپارلانىپ وتىر. بۇدان باسقا, قالا بويىنشا 18 مىڭ پاتەر جالعا بەرىلەدى, سونىڭ 3 مىڭى تاۋلىك بويىنشا تاپسىرىلادى, بۇل 10 000 ادامعا 3-4 توسەك ورىندى قاراستىرادى. مۇنىمەن قوسا, ەكسپو وتكىزىلەتىن كەزەڭدەگى وقيعالىق شارالاردىڭ كۇنتىزبەسى جاسالدى. ال تۋريستەرگە ىڭعايلى بولۋى جانە تىلدىك كەدەرگىنى ازايتۋ ءۇشىن «Friendly Taxi» جوباسى ىسكە قوسىلدى. بۇل جۇيە استانا قالاسىنىڭ شەتەلدىك قوناقتارى مەن تاكسوپارك جۇرگىزۋشىلەرىنىڭ اراسىندا كوممۋنيكاتسيالار ورتالىعى بولىپ تابىلادى. جوبا ىسكە قوسىلعالى جۇيەگە قالالىق تاكسوپاركتەردىڭ 300 اۆتوكولىگى قوسىلدى.