«جانكۇيەرلەرىمىزدى جەرگە قاراتپاۋعا ۇمتىلامىز»

– دەيدى كەرلينگشى رامينا يۋنيچەۆا بۇل كۇندەرى قازاقستاندىق كەرلينگشىلەر قىسقى ۋنيۆەر­سياداعا دايىندىقتىڭ قورىتىن­دى كەزەڭىنە كىرىستى. ولار وتكەن جىلدىڭ قاراشا ايىندا وڭتۇستىك كورەيادا وقۋ-جاتتىعۋ جيىنىن وتكىزىپ, تىنىق مۇحيتى-ازيا ويىندارىندا ونەر كورسەتىپ قايتتى. قازاقستاندا كەرلينگ وتە قارقىندى دامىپ كەلە جاتقان سپورت تۇرلەرىنىڭ ءبىرى بولىپ تابىلادى. 1998 جىلدان باستاپ وسى سپورت ءتۇرى وليمپيادا باع­دارلاماسىنا ەنگىزىلگەن بولاتىن. الماتىنىڭ قىسقى ۋنيۆەر­سيادانى وتكىزۋگە قۇقىق الۋى ەلىمىزدە كەرلينگتىڭ دامۋىنا تاعى ءبىر سەرپىن بەرەدى. قازاقستان كەر­لينگ قاۋىمداستىعىنىڭ باس حاتشىسى ۆيكتور كيمنىڭ ايتۋىنشا, قىسقى ۋنيۆەرسياداعا بيىك ماقساتتاردى كوزدەگەن جاس كوماندا قاتىسپاقشى. – ءبىز قازاقستاننىڭ توعىز ايماعىنداعى سپورتشىلاردان ۇلتتىق قۇرامانى جينادىق. ولاردىڭ بارلىعى كەرلينگ دەسە, ىشەر اسىن جەرگە قوياتىن, وسى سپورت تۇرىمەن شۇعىلدانعىسى كەلەتىن قىز-جىگىتتەر. كومان­دامىزدا قازىر 20 ادام بار, بار­لىعى ونەر كورسەتۋگە ساقا­داي دايىن وتىر. الايدا, ولار­دىڭ كەرلينگپەن اينالىسىپ جۇرگەنىنە بار-جوعى 1-2 جىل عانا بولعانىن ەسكەرۋ قاجەت. ال ۋنيۆەرسيادا كەزىندە الەمدىك دەڭگەيدەگى كوماندالار قاشاندا كۇشتى قۇراممەن قاتىسادى. ۋنيۆەرسيادا – ماڭىز­دىلىعى جاعىنان وليمپيا ويىندارىنان كەيىن ەكىنشى ورىندا تۇرعان جارىس. وعان رەسەي, شۆەيتساريا, چەحيا, گەرمانيا, شۆە­تسيا, كانادا, وڭتۇستىك كورەيا, جاپونيا سەكىلدى ەلدەردەن الەم­نىڭ مىقتى كوماندالارى قاتى­سادى. ارينە, ولارمەن باسەكەگە ءتۇسۋ قيىن بولماق, الاي­دا, ءبىز ءبۇ­كىل كۇشىمىزدى سالامىز, – دەدى ول. قازاقستاننىڭ كەرلينگتەن ۇلتتىق قۇراما مۇشەلەرى وسىنداي اۋقىم­دى سپورت باسەكەسىندە ەل نامىسىن ايان­باي قورعاۋدى نيەت تۇتىپ وتىر. – ۋنيۆەرسياداعا دايىن­دىعىمىز قىزۋ ءجۇرىپ جاتىر. جارىستار جاقىنداعان سايىن ءبارىمىز تولقىپ ءجۇرمىز, ءويت­كەنى, ءوز ەلىمىزدە سايىسقا ءتۇسۋ – ءبىز ءۇشىن ۇلكەن جاۋاپ­كەر­شىلىك. ءبىزدىڭ ويىندارىمىزدى جان­كۇيەرلەرىمىز تاماشالاي­تىندىقتان, بار كۇ­شىمىزدى سالىپ, ايانباي ويىن كور­سەتۋىمىز قاجەت, – دەيدى قازاق­ستان­نىڭ كەر­لينگتەن  ايەلدەر قۇرا­ما­سىنىڭ سكيبى رامينا يۋني­چەۆا. ۋنيۆەرسيادا-2017 اياسىن­داعى كەرلينگ جارىسى «ال­ماتى-ارە­نا» كەشەنىنىڭ تەگىس مۇز توسەل­گەن ستاديونىندا وتەدى. ايناش ەسالي, «ەگەمەن قازاقستان»