كۇشەيتىلگەن رەجىمدە جۇمىس ىستەدى

«قازاقستان تەمىر جو­لى» ۇق» اق باسشىسى قانات الپىسباەۆ قىس مەزگىلىندە تەمىر جول كولىگىنىڭ ءجۇرىسى مەن جولاۋشى تاسىمالىنىڭ قالىپتى قىزمەت اتقا­رۋىن قامتاماسىز ەتۋ تۋرالى سەلەكتورلىق جي­نالىس وتكىزدى. قىس باستالعالى بەرى اۋا رايى­نىڭ قولايسىزدىعى قازاق­ستاننىڭ بارلىق اي­ماق­تارىندا توتەنشە جاع­دايلار تۋدىردى. قار كوش­كىنى, بۇرقاسىن, قاتتى جەل, كوكتايعاق كۇردەلى كولىك پروبلەمالارىنا الىپ كەلدى. بىرنەشە ۇشاق ساپارلارى كەيىنگە شەگەرىلىپ, كولىك جولدارى جابىلدى. جەلتوقسان ايى ىشىندە رەسپۋبليكالىق ماڭىزى بار جولداردىڭ 156 جابىلۋ وقيعاسى تىركەلدى. جاڭا جىلدىڭ 5 كۇنىندە كولىك قوزعالىسىنا 50 رەت شەكتەۋ قويىلدى. كەيبىر جول تەلىمدەرىندە وندا­عان كولىك, جۇزدەگەن ادام قار تۇتقىنىندا قالىپ قوي­دى. اۋا رايىنىڭ كۇردەلى جاعدايىندا تەمىر جول قوز­عالىسى باياۋلاعان جوق, ءبىر­قالىپتى جۇمىس ىستەدى. بۇل كەزەڭدە پويىز كولىكتىڭ ەڭ قول­جەتىمدى جانە قولايلى ءتۇرى بولىپ, جولاۋشىلار اعى­­نىنىڭ ەداۋىر وسىمىنە اكەل­دى. جولاۋشىلار سانى جا­ڭا­جىل­دىق مەرەكەلەر كەزىن­دە انا­عۇرلىم ءوستى. اۋا رايى­نىڭ كۇردەلى جاعدايىندا تەمىر جول كەشەنىنىڭ قالىپتى قىز­مە­تىن قامتاماسىز ەتۋگە «قتج» ۇق» اق كوپ كوڭىل بولەدى. «بارلىق قىزمەتتەر كۇ­شەي­تىلگەن, ايرىقشا جۇ­مىس تارتىبىنە كوشىرىلدى. قاۋىپسىز جانە ۇزدىكسىز تاسى­مالدى قامتاماسىز ەتۋ بو­يىن­شا بارلىق شارالار قول­دانىلۋدا», – دەدى ق.ال­پىس­­باەۆ ءوزىنىڭ سوزىندە. جەل­توقساننىڭ سوڭعى ون كۇنىندە جانە قاڭتاردىڭ باسىندا كوبىنەسە ۇزىن قۇرامدى جولاۋشىلار پويىزدارى جۇ­مىس ىستەدى. 44 جولاۋشىلار پويىزىنا قوسىمشا 500 ۆاگون, كەيبىر كۇندەرى ءتىپتى 7200 ورىن سىيىمدىلىعى بار 80-گە جۋىق قوسىمشا ۆاگوندار تىركەلگەن. «جولاۋشىلار تاسىمالى» اق پرەزيدەنتى ن.قيلىبايدىڭ ايتۋىنشا, 50 مىڭنان استام جولاۋشى قار قۇرساۋىنان شىعارىلعان. وتكەن جىلدىڭ جەلتوقسانىندا 2 ملن-نان استام جولاۋشى تاسىمالدا­نىپ­تى. بۇل – 2015 جىلدىڭ جەلتوقسان ايىمەن سا­لىس­­تىرعاندا 100 مىڭ ادامعا كوپ. جەلتوقسان ايىنان بەرى قاراي تۇتاستاي العاندا 746 مىڭ تەكشە مەتر قار شىعا­رىلىپ, 81 مىڭ كم تەمىر جول تازالانعان. سەلەكتورلىق جينالىس كەزىندە اقمولا, قاراعاندى, پاۆلودار جول بولىمشەلەرىنىڭ جەتەكشىلەرى اۋا رايىنىڭ كۇردەلى جاع­دايىن­دا تاسىمالدى قام­تاماسىز ەتۋ باعى­تىندا قول­دانىلىپ جاتقان شارالار تۋرالى مالىمدەدى. ال كومپانيا باسشىسى ق.الپىسباەۆ قوسىمشا تىركەمەلەردى ءىس­كە اسىرۋ ءۇشىن جولاۋشى ۆاگون­دارىنىڭ تولىق رەزەرۆىن پايدالانۋ كەرەكتىگى جايىندا تاپسىرما بەردى. ارنۇر اسقار, «ەگەمەن قازاقستان»