اقتوبە قالاسىندا جەرگىلىكتى باسقارۋشى كومپانيالاردىڭ قاتىسۋىمەن وتكەن قاردان جاسالعان مۇسىندەر بايقاۋى قورىتىندىلانىپ, ەڭ ۇزدىكتەرى انىقتالدى. قالالىق اكىمدىك ۇيىمداستىرعان بايقاۋعا قالاداعى 28 باسقارۋشى كومپانيا قاتىستى. بايقاۋدى وتكىزۋدەگى ماقسات تۇرعىن ءۇي اۋلالارىندا قاردان ءمۇسىن جاساپ, شاھاردى شىرايلاندىرىپ, وقۋشىلاردىڭ دەمالىس ۋاقىتتارىن ءتيىمدى پايدالانۋعا جاعداي جاساپ, قالا تۇرعىندارىنا كوتەرىڭكى كوڭىل كۇي سىيلاۋ بولىپ تابىلادى.
شارادا ءسوز العان قالا اكىمى ءىلياس يسپانوۆ مۇنداي بايقاۋلاردىڭ ءالى دە جالعاساتىنىن تىلگە تيەك ەتە كەلىپ, جاز ايلارىندا اۋلالاردىڭ ءىشىن اباتتاندىرۋ جۇمىستارى جۇرگىزىلەتىنىنەن حاباردار ەتتى.
بايقاۋ ناتيجەسى بويىنشا ەسەت باتىر كوشەسىندەگى №105 ءۇيدىڭ اۋلاسىندا جاسالعان سىرعاناق ءبىرىنشى ورىندى يەلەندى. №14 باسقارۋ كومپانياسى جاساعان سىرعاناقتىڭ ەرەكشەلىگى تاۋىق جىلىن بەينەلەۋىمەن قۇندى. قىزىلدى-جاسىلدى تۇستەرگە بويالعان ءمۇسىننىڭ بيىكتىگى – 4 مەتر, ال سىرعاناقتىڭ ۇزىندىعى 20 مەترگە جۋىق بولىپ قالادى.
ەكىنشى ورىن №11, ال ءۇشىنشى ورىن №4 باسقارۋ كومپانيالارىنىڭ ەنشىسىنە بۇيىردى. جەڭىمپاز جانە جۇلدەگەر باسقارۋشى كومپانيالارعا ارنايى سەرتيفيكات تابىستالدى.
قازىر اقتوبە قالاسىندا تۇرعىن ۇيلەر اۋلالارىن قىسقى كەزەڭگە ساي كورىكتەندىرۋ جانە سپورت الاڭدارىن اشۋ جۇمىستارى جۇرگىزىلۋدە. مەكتەپ جاسىنداعى بالالار مەن جاسوسپىرىمدەردىڭ قىسقى دەمالىسىن ءتيىمدى ۇيىمداستىرۋ ماقساتىندا 60-قا جۋىق مۇز ايدىنى اشىلىپ, يگىلىككە قىزمەت ەتۋدە.
ساتىبالدى ءساۋىرباي,
«ەگەمەن قازاقستان»
اقتوبە
