ۇلتتىق ۇلانعا - 25 جىل

ەلىمىز تاۋەلسىزدىك العان تۇستا مەملەكەت باسشىلىعى ۇلتتىق ۇلان اسكەرىنە اسا جاۋاپتى جۇك – وسكەمەن, كۋرچاتوۆ جانە ستەپنوگورسك قالالارىندا بۇرىنعى كەڭەس وداعىنان مۇراگەرلىككە قالعان ەرەكشە ماڭىزداعى نىسانداردى كۇزەتۋدى سەنىپ تاپسىرعان. ال سول 1992 جىلى ەلىمىزدىڭ قۇقىقتىق ءتارتىبىن قامتاماسىز ەتۋ ءۇشىن اقمولا, ورال, تەمىرتاۋ جانە جامبىل قالالارىندا موتوتەحنيكالى ارنايى اسكەري بولىمدەر, سونداي-اق قاراعاندى قالاسىندا تۋرا وسىنداي باتالون قۇرىلىپ, كەيىن ول پولك بولىپ جاساقتالعان. بۇل تۋرالى بۇگىن ورتالىق كوممۋنيكاتسيالار قىزمەتىندە ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى گەنەرال-مايور مۇحامەتقالي ساتوۆتىڭ قاتىسۋىمەن وتكەن بريفينگتە بەلگىلى بولدى. ونىڭ ايتۋىنشا, الماتىدا جەكە بريگادا قۇرىلسا, وسى قالانىڭ ماڭىنداعى كەزىندەگى كراسنىي ۆوستوك كەنتىندە جەدەل بريگادا قۇرامى جاساقتالىپ, كەيىن بۇل قۇراما رەسپۋبليكالىق ۇلان, بۇگىنگى تاڭداعى مەملەكەتتىك كۇزەت قىزمەتىنىڭ قالىپتاسۋىنا نەگىزدەمە بولعان. ­ -ۇلتتىق ۇلان ءوزىنىڭ قالىپتاسۋ جولىندا بىرقاتار جەتىلدىرۋ كەزەڭدەرىن باسىنان وتكەردى. ماسەلەن, 2013 جىلى مەملەكەت باسشىسىنىڭ «قر ءىىم ىشكى اسكەرلەرى تۋرالى» زاڭىنا وزگەرتۋلەر مەن تولىقتىرۋلار ەنگىزۋ تۋرالى جارلىعىمەن اسكەردى باسقارۋ جۇيەسى قۇرامالىق باسقارۋدان وڭىرلىك باسقارۋعا كوشىرىلدى. وسىنىڭ ناتيجەسىندە اسكەري بولىمدەر مەن بولىمشەلەردىڭ جاۋىنگەرلىك قابىلەتى جانە جەدەلدىگى ارتىپ, باسقارۋ ءىسى قاراپايىم ءارى ءتيىمدى بولا ءتۇستى. بىلتىرعى جىلى 2014-2016 جىلدارعا ارنالعان اسكەردى دامىتۋ باعدارلاماسى ءساتتى اياقتالدى, - دەدى گەنەرال-مايور مۇحامەتقالي ساتوۆ. سونىمەن قاتار بريفينگتە ەلباسى – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى نۇرسۇلتان ءابىش ۇلى نازارباەۆ ەل تاۋەلسىزدىگىنىڭ 25 جىلدىعىنا ارنالعان سالتاناتتى جيىندا ەگەمەندىكتىڭ ارقاسىندا مەملەكەتىمىزدىڭ قول جەتكىزگەن 7 جاھاندىق تريۋمف-سالتاناتىنىڭ ءبىرى رەتىندە زاماناۋي قارۋلى كۇشتەرى مەن قۇقىق قورعاۋ جۇيەسى قۇرىلعاندىعى تۋرالى ەرەكشە اتاپ وتكەندىگى دە ايتىلدى. "ايرىقشا اتاپ وتەرلىگى, قازاقستان رەسپۋبليكاسىنىڭ ۇلتتىق ۇلانى (بۇرىنعى ىشكى اسكەرلەرى) قازاق ەلى تاۋەلسىزدىك العان سوڭ ەلباسىنىڭ جارلىعىمەن 1992 جىلدىڭ 10 قاڭتارىندا العاشقى كۇش-قۋات قۇرىلىمى بولىپ قۇرىلدى", دەدى ول. ونىڭ ايتۋىنشا, ەگەر قۇقىقتىق ءتارتىپ اسكەرىنىڭ تاريحى مەن دامۋ جولىنا توقتالار بولساق, ونى ءۇش كەزەڭگە ءبولىپ قاراۋعا بولادى. ءبىرىنشى كەزەڭ 1992-2000 جىلدار ارالىعىن قامتيدى. وسى كەزەڭگە اسكەرىمىزدىڭ قۇرىلۋى مەن دامۋ جولى تيەسىلى. وسى ۋاقىت كەزەڭىندە اسكەردىڭ زاڭنامالىق ىرگەتاسى قالاندى, كادرلىق الەۋەتى جەتىلدىرىلدى, سونداي-اق بولىمشەلەر تاجىك ەلىندە بىتىمگەرلىك ميسسيانى اتقارىپ, قالىپتاسۋدىڭ اسا كۇردەلى كەزەڭدەرىن باسىنان وتكىزدى. ەكىنشى كەزەڭ 2000-2007 جىلدارى ىشكى اسكەردى رەفورمالاۋعا ارنالعان مەملەكەتتىك ءبىرىنشى باعدارلامانىڭ جۇزەگە اسىرىلۋىن قامتيدى. «ال ءۇشىنشى كەزەڭ – بۇل ۋاقىت بولشەگىنە 2008-2016 جىلداردى, ياعني ءوزىنىڭ كۇش-قۋات الەۋەتى جاعىنان بارىنشا جاندانىپ دامىعان, اسكەردى باسقارۋدىڭ جۇيەسى بىرقاتار زاماناۋي وزگەرىستەرگە ۇشىراعان, اسكەر قۇرامىنىڭ جاۋىنگەرلىك دايىندىعى مەن مۇمكىندىكتەرى جاڭا تالاپتارعا سايكەستەندىرىلگەن, حالىقارالىق بايلانىستار ىنتىماقتاستىعى جولعا قويىلىپ, ەڭ اياعى ىشكى اسكەردەن ۇلتتىق ۇلان بولىپ قالىپتاسۋ جىلدارىن جاتقىزۋعا بولادى», - دەدى گەنەرال-مايور م.ساتوۆ. داستان كەنجالين, "ەگەمەن قازاقستان".