"بولاشاق" تۇلەگى ۇلتتىق اكسەسسۋار برەندىن قۇردى

2010 جىلى "بولاشاق" باعدارلاماسىمەن بريتانيادا ماگيستراتۋرا بويىنشا ءبىلىم الىپ قايتقان اسەل ءادىلدىڭ ماماندىعى قارجىگەر. بۇل تۋرالى Forbes قازاقستان باسىلىمى جازادى. "مەن شەت ەلدە وقىپ ءجۇرىپ قازاقستانعا دەگەن ساعىنىشىمدى بىلدىرەتىن ۇلتتىق ناقىشتاعى اكسەسسۋار ىزدەدىم. دەگەنمەن, ول كەزدە تەك قولدان جاسالعان (hand made) بۇيىمدار عانا ساتىلاتىن. ال ولاردىڭ ساپاسى ايتارلىقتاي جاقسى ەمەس. سول كەزدە ماعان ۇلتتىق ناقىشتاعى ويۋلارمەن ورنەكتەلگەن, قولدان ەمەس, فابريكادا ساپالى دايىندالعان بۇيىمدار جاساۋ تۋرالى وي كەلدى", - دەيدى شەبەر. جاڭا ستارتاپقا اپكەسى اسەلدىڭ اپكەسى ينديرا دا قولداۋ ءبىلدىرىپ, 15 مىڭ دوللار قارجى بەرەدى. وسىلايشا Adili برەندىمەن ۇلتتىق ناقىشتاعى بۇيىمدار ومىرگە كەلەدى. "باستاپقىدا ساتۋ جاعى قيىنداۋ بولدى. فابريكادا ءوندىرىس ءجۇرۋ ءۇشىن تاپسىرىس تا تيىسىنشە كوپ بولۋى كەرەك. مەنىڭ قىتايدا تانىستارىم بار ەدى, سولار تاپسىرىستارىمدى ورىندايتىن تىگىن شەبەرحاناسىن تاۋىپ بەردى. قازىر ءبىز تۇركياعا دا تاپسىرىس بەرىپ جاتىرمىز", - دەيدى اسەل. اپالى-ءسىڭىلى ينديرا مەن اسەل باسىندا قازاقستاندا تىگۋدى جوسپارلاعان ەكەن. دەگەنمەن, ەلدە مۇنداي تاپسىرىستاردى ورىنداي الاتىن شەبەرحانا بولماعان. قازىر كاسىپكەردىڭ نەگىزگى ارىپتەستەرى قىتايدا, الداعى ۋاقىتتا اسەل يتاليانىڭ كومپانيالارىمەن دە جۇمىس ىستەۋدى جوسپارلاپ وتىر. برەندتىڭ پايدا بولعانىنان بەرگى ءتورت جىل بويى اسەل جالعىز جۇمىس ىستەپ كەلەدى. "مەنىڭ بۇل سالادا ەشقانداي دا ءبىلىمىم جوق. تەك بالا كەزدە شىعارماشىلىققا قۇمار ەدىم", - دەيدى اسەل.