2017 جىلدىڭ 10 قاڭتارىنان باستاپ ۆوكزال ماڭى اۋماعىنداعى تۇراق اقىلى بولادى. «استانا قالاسىنىڭ تۇراق كەڭىستىگىن باسقارۋ» جوباسى شەڭبەرىندە ەنگىزىلەتىن اقىلى تۇراق جۇيەسى ۆوكزال ماڭىنداعى الاڭدا كولىك قۇرالدارىنىڭ اينالىمىن 30-40%-عا ۇلعايتۋعا مۇمكىندىك بەرەدى, دەپ حابارلايدى قالا اكىمدىگى.
سونداي-اق, قوعامدىق كولىككە سۇرانىس 15-20%-عا ارتىپ, اۋدانداعى جولدار جەلىسىنە جۇكتەمە 20-30%-عا ازايادى دەپ كۇتىلۋدە. سونىمەن بىرگە, اقىلى اۆتوتۇراق جۇيەسى جول-كولىك وقيعالارىنىڭ سانىن 70-80%-عا, ال تۇراققا جۇكتەمەنى 40-50%-عا تومەندەتۋگە مۇمكىندىك بەرەدى. اقىلى اۆتوتۇراقتى ۇيىمداستىرۋ بويىنشا دايىندىق جۇمىستارى اياقتالۋعا جاقىن.
اۆتوتۇراقتىڭ سىيىمدىلىعى 250 كولىككە ەسەپتەلگەن, سونىڭ 9-ى مۇمكىندىگى شەكتەۋلى جۇرگىزۋشىلەرگە جانە 20 ورىن رەسمي تاكسوموتورلىق كاسىپورىنداردىڭ وكىلدەرىنە ارنالعان.
العاشقى 30 مينۋت ءۇشىن اقى الىنبايدى, كولىكتى ەكى ساعاتقا دەيىن قالدىرۋ - 200 تەڭگە, 12 ساعاتقا دەيىن - 1000 تەڭگە, 24 ساعاتقا - 1800 تەڭگە, اۆتوتۇراق قىزمەتىن ەكىنشى تاۋلىك پايدالانعانى ءۇشىن 2000 تەڭگە الىنادى. سونىمەن بىرگە, ۆوكزالدىڭ اۋماعىندا 100 ورىنعا ارنالعان بالامالى تەگىن اۆتوتۇراق جۇمىسىن جالعاستىرادى.
اۆتوتۇراققا كولىك قۇرالىن ورنالاستىرۋ ءۇشىن تولەم پاركوماتتارىنىڭ كومەگىمەن ىسكە اسىرىلادى, ولار تەمىرجول ۆوكزالىنىڭ ەسكى جانە جاڭا عيماراتتارىنىڭ اۋماعىندا ورنالاسقان. اۆتوتۇراق بيلەتىن جوعالتقان جاعدايدا كولىك يەلەرى ASTRA Park اكىمشىلىگىنە (ەسكى تەمىرجول ۆوكزالىنىڭ ەكىنشى قاباتىندا) جۇگىنە الادى.
اقىلى تۇراق جۇيەسى جۇمىس ىستەيتىن العاشقى ۋاقىتتا ەسەپ ايىرىسۋ اقشالاي تۇردە جۇرگىزىلىپ, كەزەك-كەزەڭمەن جۇيەگە ونلاين-تولەم, بانكتىك كارتامەن جانە ۇيالى قوسىمشا ارقىلى تولەم جاساۋ قىزمەتتەرى ەنگىزىلەدى.
