استانادا ەكى كۇن ىشىندە 2400 ادام ۋاقىتشا تىركەۋگە تۇردى

وتكەن سەنبى, جەكسەنبى كۇندەرى استانادا 6500-دەن استام ازامات تىركەۋگە تۇرسا, ونىڭ ىشىندە شامامەن 2400 ادام ۋاقىتشا تىركەلگەن, دەپ حابارلايدى استانا قالالىق ءىىد ءباسپاسوز قىزمەتى. استانا قالالىق ءىىد باستىعىنىڭ ورىنباسارى, پوليتسيا پولكوۆنيگى باتىرلان ەسەنبايدىڭ ايتۋىنشا, تۇرعىلىقتى جەرى بويىنشا ازاماتتاردىڭ ۋاقىتشا تىركەۋگە تۇرۋى تۋرالى كوشى-قون زاڭناماسىنداعى جاڭا ەرەجەلەرگە بايلانىستى وسى جىلدىڭ 7-8 قاڭتارىندا كوشى-قون پوليتسياسىنىڭ قىزمەتكەرلەرى حالىققا قىزمەت كورسەتۋ ورتالىقتارىندا ازاماتتاردى قابىلداعان. «حالىققا قىزمەت كورسەتۋ ورتالىقتارىندا حالىققا ىڭعايلى جاعداي جاساۋ جانە ازاماتتاردىڭ تىركەلۋ ۇدەرىسىنەن جەدەل ءوتۋىن قامتاماسىز ەتۋ ماقساتىندا قالا, اۋداندارىنداعى حالىقتىڭ تىعىزدىعىنا بايلانىستى كوشى-قون پوليتسياسىنىڭ جۇمىس ورنى تورتتەن التىعا دەيىن ۇلعايتىلدى. دەمالىس كۇندەرى استانا بويىنشا جالپى 6500-دەن استام ادام تىركەلدى, ونىڭ ىشىندە 2400 ازامات ۋاقىتشا تىركەۋگە تۇردى», – دەدى ب. ەسەنباي. ايتا كەتەيىك, تۇراتىن نەمەسە ۋاقىتشا تىركەۋگە تۇرۋ ءۇشىن پاتەر يەسىنىڭ (پاتەر يەسى جەكە كۋالىگىمەن ءوزى كەلۋى قاجەت) نەمەسە پاتەر يەسىنىڭ سەنىمدى تۇلعاسىنىڭ كەلىسىمى قاجەت. سونىمەن قاتار تىركەلۋشىنىڭ جەكە كۋالىگى مەن 226,9 تەڭگە مولشەرىندە تۇرعىلىقتى مەكەنجايعا تىركەلگەندىگى ءۇشىن مەملەكەتتىك سالىق تولەگەندىگى تۋرالى تۇبىرتەگى  قاجەت بولادى.