«استانا» ويىنشىسى «ۆالەنسياعا» كەتەدى

«استانانىڭ» جارتىلاي قورعاۋشىسى نەمانيا ماكسيموۆيچ يسپانيانىڭ «ۆالەنسيا» كلۋبىمەن 2022 جىلدىڭ ماۋسىم ايىنا دەيىن الدىن الا كەلىسىمشارتقا وتىردى. بۇل تۋرالى sports.kz حابارلادى. «ۆالەنسيا» – ەۋروپانىڭ الپاۋىت كوماندالارىنىڭ ءبىرى. كەلىسسوزدەر ۇزاققا سوزىلا قويعان جوق. ماعان كوپتەگەن كلۋبتاردان ۇسىنىس تۇسكەنى راس. بىراق مۇندا ءبارى وزگەشە. ۇجىمنىڭ العا قويعان ماقساتى زور. «استانا» بۇعان ەش قارسىلىق بىلدىرمەيدى دەپ ۇمىتتەنەمىن. بۇل ءىس الداعى 5-6 كۇندە اياقتالادى دەگەن ويدامىن», – دەدى ماكسيموۆيچ. ونىڭ كەلىسىمشارت مەرزىمى 2017 جىلدىڭ ماۋسىم ايىندا اياقتالادى. ەگەر «استانا» ءوز ويىنشىسىن جىبەرۋگە قارسى بولسا, سەربيالىق جازدا اۋىسادى. بۇعان دەيىن نەمانيا ماكسيموۆيچكە پورتۋگاليانىڭ «بەنفيكا», «سپورتينگ» يتاليانىڭ «يۋۆەنتۋس», سونداي-اق, «موناكو» كوماندالارىنان ۇسىنىس تۇسكەن. B92 باسىلىمىنىڭ مالىمەتى بويىنشا 21 جاستاعى حاۆبەك 5 جىلدا 7 ميلليون ەۋرونى اقشا الادى. ايتا كەتەيىك, ول 2015 جىلى سەربيانىڭ جاستار قۇراماسىمەن (U-21) الەم چەمپيونى اتانسا, وتكەن جىلى نەگىزگى قۇراماعا العاش رەت شاقىرتۋ الىپ, ءۇش جولداستىق كەزدەسۋگە قاتىسقان. ەلوردالىقتاردىڭ ساپىندا 2015 جىلدىڭ اقپان ايىنان بەرى ونەر كورسەتىپ كەلەدى. وسى ۋاقىت ارالىعىندا ەكى دۇركىن ەل چەمپيونى اتانىپ, ءبىر مارتە قازاقستان كۋبوگىندا جەڭىسكە جەتكەن. پرەمەر-ليگادا 54 ويىنعا قاتىسىپ, 9 گولدىڭ, 6 ناتيجەلى پاستىڭ اۆتورىن اتانعان. سونىمەن قاتار, ءوز كلۋبىن چەمپيوندار ليگاسى مەن ەۋروپا ليگاسىنىڭ توپتىق كەزەڭىنە جولداما الۋعا سەپتىگىن تيگىزگەن. «ۆالەنسيا» – ەۋروپا رەيتينگىندە العاشقى وندىققا ءجيى كىرەدى. ءوز تاريحىندا 6 رەت يسپانيا چەمپيونى اتاعىنا قول جەتكىزگەن. ال بيىل لا ليگادا 12 ۇپايمەن 20 كوماندانىڭ ىشىندە 17-ورىندا كەلەدى.