مىسىردا الەمدەگى ەڭ ارزان كولىك شىعارىلادى

مىسىردىڭ كولىك قۇراستىرۋشى كاسىپورىندارى 2017 جىلى تولىعىمەن مىسىردا جاسالعان جانە رەكوردتى تومەن باعادا بولاتىن جاڭا كولىك مودەلىن ۇسىنۋعا ۋادە ەتۋدە, دەپ حابارلايدى قازاقپارات "ال-احرام ەبدو" باسىلىمىنا سىلتەمە جاساپ. كولىكتىڭ تەحنيكالىق سيپاتتامالارى, كولەمى جانە اتاۋى ازىرگە قۇپيادا ۇستالۋدا. دەگەنمەن, جاڭا مودەل تانىستىرىلاتىن كۇن بەلگىلەنىپ قويعان - 2017 جىلدىڭ 30 ماۋسىمى. ماركەتينگىلىك زەرتتەۋلەر 92 ميلليوننان استام حالقى بار مەملەكەت ءۇشىن تازا مىسىرلىق اۆتونى قۇراستىرۋ قاجەتتىلىگى بۇرىننان تۋىنداعانىن ايتۋدا. ساراپشىلاردىڭ پايىمىنشا, كولىكتىڭ باعاسى راسىمەن دە, باسەكەدەن تىس بولادى. سەبەبى, 2016 جىلدىڭ سوڭىندا جەرگىلىكتى ۆاليۋتا - مىسىرلىق فۋنت اقش دوللارىمەن سالىستىرعاندا ەكى ەسەدەن استامعا ارزاندادى. بۇعان دەيىن مىسىرلىق ينتەرنەت-باق-تار ەلدە ۇندىستاندىق Nano كولىگىنىڭ كلونىن قۇراستىرۋ ءىسى قولعا الىناتىندىعىن حابارلاعان بولاتىن. كولىك ارنايى ىستىق كليمات ءۇشىن جاساپ شىعارىلعان. ول 30 شاقىرىمعا 1 ليتر بەنزين تۇتىنادى, بارىنشا جوعارى جىلدامدىعى ساعاتىنا 90 شاقىرىم.