09 قاڭتار, 2017

جۇرەگى كىرلەگەندەردەن مەيىرىم كۇتپەڭىز!

586 رەت
كورسەتىلدى
6 مين
وقۋ ءۇشىن
كەيدە كوڭىلىڭ شاتتانىپ, كوكىرەگىڭدى قۋانىش بيلەگەندە سول ءبىر ءسات ەشقاشان كەتپەيتىندەي سەزىلەدى. ال, قانداي دا ءبىر قايعى كەلسە, جانىڭ اۋىرىپ, جۇرەگىڭ سىزدايتىنى تاعى بار. پەندە بولعاسىن پەشەنەڭە جازعانىن كورۋ زاڭدىلىق تا شىعار. دەسەك تە, كەيدە باسىمىزعا تۇسكەن كەيبىر قيىنشىلىق پەن قايعى وسى پەندەلەردىڭ پەيىلىنىڭ تارلىعىنان دا بولىپ جاتاتىنى بەلگىلى. اللا تاعالا پەرىشتەلەرگە اقىل بەردى, بىراق ءناپسى بەرمەدى, جان-جانۋارلارعا ءناپسى بەردى, بىراق اقىل بەرمەدى. ال, ادام بالاسىنا ەكەۋىن دە بەردى. ءسىز وسىنىڭ قايسىسىن ءجيى پايدالاناسىز؟ قوعامدىق ورتادا بولسىن, قوعامدىق كولىكتە بولسىن, وتباسىندا بولسىن, كوشەدە بولسىن كەيدە ادامداردىڭ جۇرەگىنەن مەيىرىم جوعالىپ بارا جاتقانداي كورىنەدى. اڭگىمەنىڭ القيسساسىن وتباسىنان باستايىقشى. ءاسىلى, اكە-شەشەنىڭ بالاعا دەگەن مەيىرىم-ماحابباتى ونى جاقسى كيىندىرىپ, جىلى تاماق بەرۋمەن شەكتەلمەسە كەرەك. بالا ەڭ ءبىرىنشى, اتا-انانىڭ ءتاتتى تاماعىنا ەمەس, اشىق-جارقىن قاباعىنا مۇق­تاج ەمەس پە؟ ۇلىڭىزدى تىزەڭىزگە وتىر­عىزىپ, قىزىڭىزدى باسىنان سيپاپ ءبىر مينۋت ەركەلەتۋدىڭ ءوزى ولارعا قانشاما قۋانىش اكەلەتىنىن اڭعارا بەرمەيسىز. ءسىز جىلى سويلەگەن سا­يىن ولاردىڭ جۇرەگى ەلجىرەپ, سىزگە ىشىندەگى بار سىرىن ايتىپ تاستاۋعا دايار تۇراتىنىن بايقادىڭىز با؟ مىنە, ول ءسىزدىڭ ءسال عانا جىلى قاباق تا­نىتقانىڭىزدىڭ اسەرى. ەگەر وسى قاعيدانى تىرشىلىگىڭىزدىڭ كۇن سا­يىن اتقارۋعا ءتيىستى ءبىر مىندەتى دەپ بىلسەڭىز, وندا ءسىز ناعىز وتاعاسى بولا الاسىز.  سەبەبى, اتا-انا بالالارىنا قانشالىقتى جاقىن بولسا, سونشالىقتى ولاردىڭ سىرىنا قانىق بولادى. بالام قايدا ءجۇر؟ كىممەن ءجۇر؟ نە ىستەپ ءجۇر دەگەن سۇراق قازىرگى اكە-شەشەلەردىڭ باس­تى قايعىسىنا اينالدى. ونىڭ سەبەبى باۋىر ەتىڭ بالاڭمەن ءسابي كۇنىنەن سىرلاسا الماۋىڭدا جاتىر. ولارعا مەيىرىممەن قاراعان سايىن مەيىرلەنە تۇسەتىنىنە ءمان بەرمەيمىز عوي, نەگىزى. كوبىمىزدىڭ كوزىمىزدى اقشا, كوڭىلىمىزدى دۇنيە, ۋاقىتىمىزدى تۇرمىس بيلەگەن­دىكتەن وسىنداي قۇنى بيىك قۇن­دى­لىقتارىمىزدى قۇردىمعا ۇشىراتامىز كەيدە. ۇش­قان ۇياسىنان مەيىرىمنىڭ ءدامىن سەزبەگەن ءسابي كىمگە مەيىرىم كورسەتپەك. مەكتەپتەگى مۇعالىمگە ما؟ ءاي, قايدام... الىپپەنى ۇيرەتكەن ۇستازدارىنا الىمجەتتىك كورسەتكەن ادەپسىزدەردى كورگەندە, مەيىرىم دەگەن ءسوزدىڭ مەزگىلى ءوتىپ كەتكەن جوق پا, وسى دەپ تە ويلايمىن. مەنىڭشە, شاكىرت دەگەن ۇستازعا ساباق ايتۋ ءۇشىن عانا قول كوتەرۋى كەرەك قوي. قازىرگى عالامتوردىڭ بە­تى­نە عالامشاردىڭ ءبارى سىياتىن سياقتى. سوڭعى ۋاقىتتا ساباق ءۇستىن­دە ۇستازدارىن ۇرعانداردىڭ بەينە كورىنىستەرى قاپتاپ كەتتى. اكەسىمەن جاستىلارعا اكىرەڭدەپ, اناسىمەن جاستىلاردى مازاقتاپ, ساباق ۇستىندە سايقىمازاق سەكىلدى ساناسىز ارەكەتتەرگە بارعان بالالاردان مەيىرىم كۇتۋ اقىماقتىق بولار. قوعامدىق كولىكتە ورىن بەر­مەي­تىندەردىڭ دەنى – وسىندايلار. ۇلكەندەر اشۋلانسا اشۋلانعانداي-اق. قۇلاعىنا قۇلاققاپ كيىپ, تەلە­فونعا تەلمىرىپ العاندار ءوز-وزدەرى­مەن ءبىر الەم. توقسان تەڭگە بەردىم ەكەن دەپ مۇنشا شالقايۋ اعاتتىق بولار. بالاسىن تۋا ساپ اجەتحاناعا تاس­تاپ جاتقان انالاردى كورگەندە, اكە-شەشەسىن قارتتار ۇيىنە اپارىپ جاتقان بالالاردى كورگەندە, تاۋارىن اسىرا ماقتاپ, ءجونسىز باعامەن ساتىپ جاتقان ساۋداگەردى كورگەندە, كولىگىن  سىرىپ كەتسەڭ جۇدىرىعىن الا جۇگىرەتىن اعالاردى كورگەندە, وكشەسىن باسىپ كەتسەڭ وكپەلەيتىن كوكەلەردى كورگەندە مەيىرىمنىڭ مەكەنىن ىزدەپ كەتەسىڭ.  ول جەر بەتىندە بار ما ءوزى؟ ىزدەسەك تابا الامىز با؟ مەنىڭشە, مەيىرىمنىڭ مەكەن-جايى جۇرەك بولۋى كەرەك. ول قانداي جۇرەك دەيسىز عوي؟ ول زارەدەي بولسا دا ز ۇلىمدىقتى ويلامايتىن, شاڭنىڭ توزاڭىنداي تاكاپپارلىققا جول بەرمەيتىن ءجۇ­رەك. تىنىشتىق پەن تازالىقتان, ادام­دىق پەن ادالدىقتان, شى­ناي­ى­­لىقتان تۇراتىن جۇرەك. سون­­­­دىق­تان دا, مەيىرىمدى بولامىن دەسەڭىز جۇرەگىڭىزبەن جۇمىس جاسا­ڭىز.  تازالاڭىز. كىرلەگەن ءجۇ­رەك­كە كىرشىكسىز ماحاببات پەن مەيى­رىم كىرە المايدى. ءبىر-بىرىمىزگە مەيى­رىمدى بولايىق. سەبەبى, وزگەگە مەيىرىم تانىتپاعاننىڭ ءوزى دە مەيىرىمگە بولەنبەيدى دەگەن بار. وسى ءسوزدىڭ ءمانى مەن ماڭىزىن جەتە ءتۇ­سىنىپ, ساناسىنا ورنىقتىرىپ, ساۋاپقا ۇمتىلعان جاندار جەتەرلىك. قايىرىمدىلىق قورلاردى قوسپاعان دا قايىرىمدى ادامداردىڭ دا قاتارى كۇن سايىن قالىڭداپ كەلەدى. سولاردىڭ ءبىرى ارمان شەكيموۆ تۋرالى الدىڭعى ماقالالارىمىزدا ءسوز ەتكەن بولاتىنبىز. بۇل جولعى كەيىپكەرىمىزدىڭ دە ءوز ەرەكشەلىگى بار. سەبەبى, ول استانادا تۇڭعىش رەت قايىرىمدىلىق دۇكەنىن اشىپ, ودان تۇسكەن قاراجاتتى ناۋقاس جانداردى ەمدەۋگە جۇمساپ جاتىر.  دۇكەندەگى تاۋار جومارت جاندار اكەلگەن كيىم, ويىنشىق, كىتاپ جانە تاعى باسقا زاتتاردان تۇرادى. باعالارى تىم ارزان. ال ساتىلىمنان تۇسكەن قارجى اۋىر ناۋقاسقا ۇشىراعان بالالارعا بەرىلەدى. «قامقورلىعىما العان بالالار­دىڭ كوبى مەديتسينالىق كومەككە ءزارۋ. اسىرەسە ءولىم اۋزىندا جات­قان­دارى جۇرەگىمدى شىمىرلاتىپ ءجى­بەرەدى. قولىمنان كەلگەنشە قول ۇشىن بەرىپ كەلەمىن. جالپى, ادام­دار ءبىر-بىرىنە كومەكتەسىپ, مەيىر­بان­دىق, قامقورلىق دەگەن ۇعىم­داردى ەستەن شىعارماعانى ابزال», دەيدى «ريزا» دۇكەنىنىڭ يەسى نۇرجامال مولداجانوۆا. ارينە, بۇل ساۋدادان قىرۋار پايدا كەلمەسى انىق. بىراق سونىڭ وزىندە اۋىس-تۇيىستەن ارتىلعان اقشانى نۇرجامال قايىرىمدىلىق قورلارىنا اۋدارىپ ءجۇر. جاقسى­لىق­تىڭ مولشەرى بولمايدى. تەك نيەتىڭىز بەن پەيىلىڭىز ادال بولسا بولعانى. سوندا عانا مەيىرىم مەكەنىن مۇز باسپاي, ادامداردىڭ اراسىنداعى جىلۋلىق پەن سىي­لاس­تىق ءجىبى ۇزىلمەيدى. راۋان قايدار, «ەگەمەن قازاقستان»
سوڭعى جاڭالىقتار