مۇمكىندىگى شەكتەۋلىلەرگە مۇمكىندىك

قوستانايدا  مۇقتاجدىعى بار مۇگەدەك بالالار ءۇشىن پسيحولوگيالىق-پەداگوگيكالىق تۇزەۋ كابينەتى اشىلدى. بۇل مۇگەدەك بالا ءوسىرىپ وتىرعان اتا-انالاردىڭ زور قۋانىشىنا اينالدى. قوعام قايىرىمدىلىقتان كەندە ەمەس, ءتۇرلى شارالار ءوتىپ, مۇمكىندىگى شەكتەۋلى جاندارعا, بالالارعا  كومەك قولىن سوزاتىندار از ەمەس. الايدا مۇگەدەك  بالا ءوسىرىپ وتىرعان اتا-انانىڭ ءوز پروبلەماسىمەن ءوزى بەتبە-بەت قالاتىن كەزدەرى از بولمايدى. سەبەبى مۇگەدەك بالانى دامىتۋ كەيدە تەك قارجىعا ەمەس, زاماناۋي جابدىقتار مەن ادىستەمەلەرگە,  ماماندار كومەگىنە ءزارۋ بولادى. ال قوستاناي وڭىرىندە وسىنداي كومەككە ءزارۋ ون مىڭنان اسا بالا بار. ولار تۇرىپ جاتقان جەرگىلىكتى جەرلەردە, اۋىلداردا, ءتىپتى اۋدان ورتالىقتارىندا ولاردى دامىتاتىن ورتالىقتار جەتكىلىكسىز, ءتىپتى جوقتىڭ قاسى. سوندىقتان, «دارا» قورىنىڭ  جوباسى اياسىندا قوستاناي وبلىسى اكىمدىگىنىڭ قولداۋىمەن مۇقتاجدىعى بار مۇگەدەك بالالار ءۇشىن پسيحولوگيالىق-پەداگوگيكالىق تۇزەۋ كابينەتىن اشۋى الدىمەن اۋرۋ بالا ءوسىرىپ وتىرعان اتا-انالاردىڭ قۋانىشىنا اينالدى. ارنايى ورتالىقتا دەفەكتولوگ, پسيحولوگ, لوگوپەد, تيفلوپەداگوگ, سۋردوپەداگوگ, ماسساجيست سەكىلدى ماماندار جۇمىس ىستەيدى. ءار كابي­نەت بالانى دامىتۋدىڭ ادىستەمەسىنە وراي زاماناۋي جاب­دىقتارمەن جابدىقتالعان. وندا مونتەسسوري ءبول­مە­سى­, دەنەشىنىقتىرۋ زالىنا دەيىن بار. – ءبىز ەرەكشە مۇقتاجدىقتارى بار بالالار مامان­دار قىز­مەتىن تەگىن پايدالانۋى ءۇشىن تۇزەۋ ورتالىقتارىن اشا­مىز. بۇل مۇمكىندىگى شەكتەۋلى بالالاردىڭ وسكەن­دە  ومىردەن ءوز جولىن تابۋىنا ىرگەتاس قالايدى. مامان­دار­دى وقىتىپ,  ەلىمىزدە ينكليۋزيۆتى  ءبىلىم بەرۋ ءىسىن ەنگىزۋدى قولداپ كەلەمىز, – دەدى «دارا» قورىنىڭ قۇرىل­تاي­شىسى گۇلنار دوساەۆا. قازىرگە دەيىن پسيحولوگيالىق-پەداگوگيكالىق تۇزەۋ كا­بينەتىنە دامۋىندا اۋىتقۋلارى بار  7 جاسقا دەيىنگى 125 بالا جازىلدى, مامانداردىڭ ايتۋىنشا, الداعى ۋاقىتتا مۇمكىندىگى شەكتەۋلى 150 بالاعا دەيىن قامتۋعا مۇمكىندىك بار. ءنازيرا جارىمبەتوۆا, «ەگەمەن قازاقستان» قوستاناي