«كەنىشتەن» شىققاندار كەندە قالمايدى

«ەل ءىشى – ونەر كەنىشى» دەگەن راس قوي. اۋىل-ايماقتاردا قانشاما ونەرلى جاستار تابيعي تالانتىن جارقىراتا الماي, تاسادا قاپ جاتقانى بەلگىلى. بىرەۋىندە جاعداي جوق, تاعى بىرىندە قولداۋ جوق. سوندىقتان جامبىل جەرىندەگى جاڭا, جاس تالانت يەلەرىن انىقتاپ,  ناسيحاتتاۋ, ولاردىڭ شىعارماشىلىق شەبەرلىگىنىڭ شىڭدالۋىنا قولداۋ كورسەتۋ ماقساتىندا بيىلعى جىلدىڭ باسىندا «جاڭا ەسىم-2016» كاستينگى جاريالانعان بولاتىن. ەسترادا, ءداستۇرلى ورىنداۋشىلار, مۋزىكا اسپاپتارى, ايتىس اقىندارى بويىن­شا وتكەن بۇل بايقاۋدىڭ العاشقى كەزەڭىندە اۋىل-ايماقتاردان بارلىعى 300-گە جۋىق ونەرپاز قاتىسىپتى. سونىڭ ىشىنەن 42 ۇمىتكەر سۋىرىلىپ شىعىپ, ەكىنشى كەزەڭنەن كەيىن جەتەۋى ۇزدىك دەپ تانىلدى. مىنە, وسى­لايشا عابيت بىرىمقۇل (شۋ اۋدانى), سەيىلعازى تاڭىربەرگەن (جامبىل اۋدا­نى), جانسايا سارسەنباەۆا (ت.رىسقۇلوۆ اۋدانى), امي­­نا يبراگيموۆا (جام­بىل اۋدانى), اسەل سۇندەت (جام­بىل اۋدانى), ادىلەت تۇراروۆ (تاراز), نۇرداۋلەت قويشىمانوۆ (بايزاق اۋدا­نى) ارنايى ديپلوممەن جانە «جاڭا ەسىم-2016» اتا­لىمى بەلگىسىمەن ماراپات­تالدى. – بۇل انشىلەرگە ارنايى تالىمگەر تاعايىندالىپ, ولاردى ساحناعا دايىنداۋ, رەپەرتۋار تاڭداۋ, جاڭا اندەرگە تاپسىرىس بەرۋ ءۇشىن سازگەر مەن اقىندار ىزدەستىرۋ, ارانجيروۆكا, جاڭا ەسىمدەردىڭ ءيميدجىن قالىپتاستىرۋ جۇ­مىستارىن اتقاراتىن بولادى, – دەي­دى جامبىل وبلىستىق ءما­دەنيەت, ارحيۆتەر جانە قۇ­جات­تاما باسقارماسى حا­لىق شىعارماشىلىعى ورتا­لى­عىنىڭ ديرەكتورى عاني سادىرباەۆ. «جاڭا ەسىم-2016» جەڭىم­­پازدارى ارنايى ۇيىم­داس­تىرىلعان گالا-كونتسەرتتە ءوز ونەرلەرىمەن قالىڭ كورەر­مەندەردى ءتانتى ەتتى. تاعى ءبىر ايتارى, وسى جوبا­عا ارنايى «جاڭا ەسىم» ءانىن جازعان سازگەر مەن جەڭىم­پازدار ورىنداعان جاڭا اندەردىڭ اۆتورلارى قوناق رە­تىندە شاقىرىلىپ, حالىق قوشەمەتىنە بولەندى. ورالحان ءداۋىت, «ەگەمەن قازاقستان» جامبىل وبلىسى