جاپون گازەتىنىڭ بيىلعى العاشقى سانى استاناداعى ەكسپو-2017 كورمەسىنە ارنالدى

2016 جىلدىڭ سوڭىنا تامان توكيودان شىعاتىن «جاپونيا جانە ەۋرازيا» گازەتىنىڭ رەداكتسيا­سىنان حات كەلگەن ەدى. «2017 جىل­عى گازەتتىڭ العاشقى سانىن استانا قالاسىندا وتەتىن ەكسپو كورمەسى تۋرالى ماقالا­مەن اشساق دەگەن جوسپارىمىز بار. حالىقارالىق كورمەگە قا­زاقستاننىڭ دايىندىعى, حالىق­تىڭ اتالعان شاراعا دەگەن ىقى­لاسى جونىندە ماقالا دايارلاپ بەرسەڭىز دەگەن تىلەگىمىز بار» دەپ جازىلىپتى حاتتا. رەسپۋبليكانىڭ الەمدىك دارەجەدەگى بەدەلىن ايعاقتايتىن ايتۋلى شارا تۋرالى جاپون وقىرماندارى دا ءبىلسىن دەگەن نيەتپەن ەكسپو-2017 تۋرالى جازباققا قۋانا-قۋانا كەلىستىم. «جاپونيا-ەۋرازيا» دەپ اتالاتىن, 1957 جىلى قۇرىلعان ءىرى ۇيىم شىعاراتىن بۇل باسىلىم جاپونيانىڭ بارلىق ايماعىنا كەڭىنەن تارايدى. ۇيىمنىڭ ايچي, يشيكاۆا, وساكا, حوككايدو, كيوتو, حيروسيما, كاناگاۆا سەكىلدى وڭىرلەردە  بولىمشەلەرى جۇمىس ىستەيدى. «جاپونيا-ەۋرازيا» ۇيىمىنىڭ ماقساتى ەۋرازيا, ورتالىق ازيا ەلدەرىمەن جاپونيانىڭ مادەني ىنتىماقتاستىعىن نىعايتۋ, ەلارالىق دوستىقتى دامىتۋ. استانادا وتەتىن ەكسپو-نى تانىستىرۋ ماقساتىنداعى ماقالامىز «جاپونيا جانە ەۋرازيا» گازەتىنىڭ 2017 جىلعى العاشقى سانىنىڭ ءبىرىنشى بەتىنە جاريالانىپتى. كارتاداعى قازاقستان مەن استاناداعى ەكسپو قالاشىعىنىڭ سۋرەتى دە باسىلعان. «استانا كورمەسى. قازاق ەلىنە قوش كەلدىڭىز!» دەگەن ارنايى ايدار تاعىلىپ, «بولاشاقتىڭ ەنەرگياسى: كۇن ەنەرگياسى, جەل ەنەرگياسى» تاقىرىبىمەن جاريالانعان ماقالادا اتالمىش شارا تۋرالى بارىنشا مول اقپارات بەرۋگە تىرىستىق. 1997 جىلدان بەرى ەلوردا سانالاتىن استانا جايىندا ءسوز قوزعادىق. ەكسپو سيمۆولىنىڭ مانىنە توقتالدىق. جەر اۋماعى بويىنشا الەمدە توعىزىنشى ورىن الاتىن رەسپۋبليكانىڭ ەكونوميكالىق الەۋەتى مەن دامۋ قارقىنىنا شولۋ جاسادىق. قازبا بايلىعى مول, جەرى سياقتى پەيىلى دە دارحان قازاق ەلى ورتالىق ازيا تورىندەگى استانا شاھارىندا وتەتىن كورمەدە بارشانى ىستىق ىقىلاسپەن قارسى الۋ ءۇشىن قىزۋ دايىندالىپ جاتقانىن ەسكە سالدىق. ماقالا «پەيىلى كەڭ, داستارقانى مول قازاقستاندا سىزدەردى كۇتەمىز!» دەگەن سويلەممەن اياقتالعان. گازەتتىڭ وسى سانىندا جاپونيا ازاماتتارىنىڭ قازاقستان تۋرالى وي-پىكىرلەرى دە جاريالانعان. شارافات جىلقىباەۆا, جاپونتانۋشى, جۋرناليست الماتى