قازاقستان سيرياعا گۋمانيتارلىق جۇك جەتكىزدى

سيريا اراب رەسپۋبليكاسىنىڭ تارتۋس پورتىنا قازاقستاننان جونەلتىلگەن گۋمانيتارلىق جۇك جەتكىزىلدى. سيريالىق بيلىككە جۇكتى قازاقستاننىڭ يوردانياداعى ەلشىسى ازامات بەردىباي تاپسىردى. كەيبىر اراب اقپارات كوزدەرىنە قاراعاندا, سيرياداعى قانتوگىس سوعىس 400 مىڭنان استام بەيبىت تۇرعىننىڭ ءومىرىن قيدى. گۋمانيتارلىق جۇكتى جەتكىزۋگە رف قورعانىس مينيسترلىگى كومەكتەسكەن كورىنەدى. تارتۋس پورتىنا كەشە جەتكەن كەمەدەن جۇكتى ءتۇسىرۋ جۇمىستارى بۇگىن باستالدى. قازاقستاننان جەتكىزىلگەن كونتەينەرلەردە ۇن, ەت ونىمدەرى, ماكارون جانە باسقا ازىق-ت ۇلىك تاۋارلارى تيەلگەن. «حالىقارالىق قوعامداستىق تاراپىنان جاسالىپ وتىرعان قولداۋعا قاراماستان, گۋمانيتارلىق احۋال ءالى دە تۇزەلگەن جوق. وسىعان بايلانىستى قر پرەزيدەنتى ن. نازارباەۆ سيرياعا ازىق-ت ۇلىك تۋارلارى تۇرىندە گۋمانيتارلىق كومەكتى جونەلتۋ شەشىمىن قابىلدادى», - دەدى ەلشى ا. بەردىباي سيريالىق دەلەگاتسيامەن كەزدەسۋ بارىسىندا.   ەستەرىڭىزگە سالا كەتەيىك, 2012 جىلى قازاقستان يسلام ىنتىماقتاستىق ۇيىمى ارقىلى يوردانيا مەن ليۆان ۇكىمەتىنە بوسقىنداعى سيريا ازاماتتارىنا كومەك رەتىندە 400 مىڭ اقش دوللارىن بولگەن بولاتىن. سونىمەن قاتار 2015 جىلدىڭ قازانىندا سيريالىق وپپوزيتسيا وكىلدەرىنىڭ كەلىسسوزىنىڭ اياقتالعان كەزىندە استانادا سيريالىقتاردىڭ ءدارى-دارمەك پەن ازىق-ت ۇلىك الۋى ءۇشىن 300 مىڭ ەۋرو گۋمانيتارلىق كومەك كورسەتۋ تۋرالى مەموراندۋمعا قول قويىلعان ەدى.