ماقتاارالدان وزبەكستانعا جول اشىلاتىن بولدى

وڭتۇستىك قازاقستان وبلىسىنىڭ اكىمدىگىندە قازاقستان رەسپۋبليكاسىنىڭ وزبەكستان رەسپۋبليكاسىنداعى توتەنشە جانە وكىلەتتى ەلشىسى ەرىك وتەمباەۆ پەن وزبەكستان رەسپۋبليكاسى سىرتقى ىستەر مينيسترلىگىنىڭ ايرىقشا تاپسىرمالار بويىنشا ەلشىسى يلحوم نەماتوۆ كەزدەسىپ, قوس مەملەكەتتىڭ تۋىستىق قارىم-قاتىناسىن ودان ءارى جاقسارتىپ, دامىتۋ جايىن تالقىلادى. جيىنعا قر ينۆەستيتسيالار جانە دامۋ ۆيتسە-ءمينيسترى رومان سكليار مەن وبلىس اكىمى جانسەيىت تۇيمەباەۆ قاتىستى, دەپ حابارلايدى قازاقپارات. جيىندا وزبەكستاننىڭ ماقتاارال اۋدانىنىڭ تەرريتورياسىندا ورنالاسقان م-39 اۆتوجولىن (887,8 شق. - 911,9 شق.)قايتا جاڭارتىپ پايدالانۋ جايى قارالىپ, اتالعان ۋچاسكەدەن وتكىزۋ بەكەتىن سالۋ ماسەلەسى ءسوز بولدى. اتاپ ايتقاندا, بۇگىنگى كۇنگە دەيىن 89 شاقىرىم جولدى ءجۇرىپ ءوتىپ, تاشكەنتتەن سامارقانعا جىزاق ارقىلى اينالىپ ءوتىپ قاتىناعان تۇرعىندار ەندى 24,5 شاقىرىمدى باسىپ ءوتىپ, ماقساتتى مەكەنگە بارا الاتىن بولادى. «اۆتوجول قايتا جاڭارىپ, پايدالانۋعا بەرىلگەندە 65 شاقىرىمداي جول قىسقارادى. بۇل قوس مەملەكەت حالىقتارىنىڭ تۋىستىق قارىم-قاتىناستارىن ودان ءارى نىعايتىپ, اراداعى ساۋدا-ساتتىق پەن ءتۋريزمدى دامىتۋعا مۇمكىندىك بەرەدى. سونىمەن قاتار, وزبەكستان استاناسى تاشكەنت پەن وڭتۇستىك قازاقستان وبلىسىنىڭ بايلانىسى كۇشەيە تۇسەدى دەگەن ۇمىتتەمىن», - دەدى قر وزبەكستان رەسپۋبليكاسىنداعى توتەنشە جانە وكىلەتتى ەلشىسى ەرىك مىلتىقباي ۇلى. ە.وتەمباەۆتىڭ ايتۋىنشا, شەكارالىق ايماقتا ارنايى بەكەت سالىنىپ, تاۋار اينالىمىنا باقىلاۋ كۇشەيگەنىمەن, سالىق سالىنبايدى. قايتا جاڭعىرعان اۆتوجول 2017 جىلدىڭ اقپان ايىندا ەل يگىلىگىنە بەرىلەدى دەپ كۇتىلۋدە. ال, ءتۇس اۋا جۇمىسشى توپ اتالعان جوبا بويىنشا ەكىجاقتى كەلىسىمگە كەلىپ, ارنايى مەموراندۋمعا قول قويدى. قر ينۆەستيتسيالار جانە دامۋ ۆيتسە-ءمينيسترى ر.سكليار مەن وزبەكستان رەسپۋبليكاسى سىرتقى ىستەر مينيسترلىگىنىڭ ايرىقشا تاپسىرمالار بويىنشا ەلشىسى ي.نەماتوۆتىڭ اراسىندا تۇزىلگەن قۇجات حالىقارالىق ەكونوميكالىق بايلانىستى نىعايتىپ, تاۋار اينالىمىن جاقسارتۋعا سەپ بولادى دەگەن سەنىم بار. اتالعان ماسەلە بويىنشا قازاقستان تاراپىنان جاسالعان جان-جاقتى قولداۋلارعا العىسىن بىلدىرگەن وزبەك ەلشىسى بۇل قادامنىڭ كورشىلەس ەلدەردىڭ ىنتىماقتاستىعىن ارتتىراتىن جاقسى باستاما ەكەنىن اتاپ ءوتتى. ەسكە سالا كەتەيىك, كورشىلەس مەملەكەتتىڭ ءمىرزاشول ارقىلى وتەتىن م-39 اۆتوجولى 2006 جىلى جابىلىپ, جەرگىلىكتى تۇرعىنداردىڭ بارىس-كەلىسىن قيىنداتقان ەدى. ەندى جاڭادان تۇزىلگەن مەموراندۋم بۇل ماسەلەنى وڭتايلى شەشىپ, قارىم-قاتىناستى تەرەڭدەتەتىندىگى انىق.