قىرىمبەك كوشەرباەۆ IPC باسشىلىعىمەن كەزدەستى

ساۋدا-ەكونوميكالىق, عىلىمي-تەحنيكالىق جانە مادەني ىنتىماقتاستىق جونىندەگى قازاقستان-بريتان ۇكىمەتارالىق كوميسسياسىنىڭ وتىرىسى اياسىندا قىزىلوردا وبلىسىنىڭ اكىمى قىرىمبەك كوشەرباەۆ «Independent Power Corporation» كومپانياسىنىڭ ديرەكتورى پيتەر ەرلمەن كەلىسسوزدەر جۇرگىزدى, دەپ حابارلايدى قىزىلوردا وبلىسى اكىمىنىڭ ءباسپاسوز قىزمەتى. وبلىس اكىمىنىڭ IPC باسشىلىعىمەن كەزدەسۋى بارىسىندا قىزىلوردا وبلىسىنداعى قۋاتتىلىعى 50 (قىزىلوردا قالاسى) جانە 30 مۆت (ايتەكە بي كەنتى) ەكى گاز تۋربينالىق ستانتسياسىنىڭ قۇرىلىسى تۋرالى ماسەلەلەر تالقىلاندى. كومپانيا ەقدب-نىڭ مەنشىكتى جانە تارتىلعان قاراجاتى ەسەبىنەن جوبانى قارجىلاندىرۋعا دايىن ەكەندىگىن جەتكىزدى. اتالعان نىساننىڭ قۇرىلىسى قازاقستان رەسپۋبليكاسىنىڭ بىرىڭعاي ەنەرگوجۇيەسىنىڭ وڭتۇستىك ايماعىنداعى قۋاتتى رەتتەۋ ارقىلى سەنىمدى ەلەكتر جۇيەسىمەن قامتاماسىز ەتەدى. قر پرەزيدەنتى نۇرسۇلتان ءابىش ۇلى نازارباەۆتىڭ وتكەن جىلى ۇلىبريتانياعا  رەسمي ساپارى بارىسىندا بريتاندىق «Independent Power Corporation» كومپانياسى مەن قازاقستاننىڭ گاز جانە گازبەن جابدىقتاۋ سالاسىنداعى ۇلتتىق وپەراتورى «قاز ترانس گاز» اق اراسىندا ءوزارا ارىپتەستىك تۋرالى مەموراندۋمعا قول قويىلعانى بەلگىلى. بۇل مەموراندۋم رەسپۋبليكا بويىنشا جالپى قۋاتى 1600 مۆت گاز تۋربينالىق ەلەكتر ستانتسيالارىنىڭ قۇرىلىسى ماسەلەلەرىن قاراستىرادى.