قوستانايدا بەلگىلى سۋرەتشى, قازاقستاننىڭ ەڭبەك سىڭىرگەن قايراتكەرى, «قۇرمەت» وردەنىنىڭ يەگەرى مارات توقسەيىتوۆتىڭ جەكە كورمەسى اشىلدى. قىلقالام شەبەرى كورمەنى «تۋعان ولكەم» دەپ اتاپتى. راسىندا, مارات تولەگەن ۇلى قوستاناي وبلىسىنىڭ قارابالىق اۋدانىندا تۋىپ وسكەن. كورمەگە ىلىنگەن شىعارمالارىنا ول تۋعان اۋىل كورىنىستەرىن ارقاۋ ەتىپتى. پولوتنوداعى اۋىلدىڭ شىنايى كورىنىستەرى اۋىلدا وسكەن كەز كەلگەن كىسىنىڭ جۇرەك قىلىن شەرتىپ تۇرعانداي.
مارات توقسەيىتوۆتى وبلىس اكىمىنىڭ ورىنباسارى مارات جۇندىباەۆ كورمەنىڭ اشىلۋىمەن جانە ەل تاۋەلسىزدىگىنىڭ 25 جىلدىق مەرەكەسىمەن قۇتتىقتادى. الداعى جىلدىڭ باسىندا 70-كە تولعالى وتىرعان سۋرەتشى شىعارماشىلىعىنا تابىستار تىلەدى. كورمەگە سۋرەتشى ماقتانىش تۇتاتىن جەرلەس كورەرمەندەرى, مارات تولەگەن ۇلىنىڭ قوستانايلىق ارىپتەستەرى دە جينالدى. بەلگىلى سۋرەتشى نيكولاي تورشين توقسەيىتوۆتى جيۆوپيس, پەيزاج جانرىنىڭ اسا ءىرى وكىلى دەپ اتادى.
-مارات تولەگەن ۇلىنىڭ سالعان شىعارمالارى شىنايىلىعىمەن باۋراپ الادى, الدىڭدا ونىڭ قىلقالامىنان شىققان سۋرەت ەمەس, ءتىرى ومىر تۇرعانداي سەزىمدە بولاسىڭ, - دەدى نيكولاي ۆاسيلەۆيچ.
-الداعى قاڭتار ايىندا استانادا كورمەم اشىلادى. مەن كورمەمنىڭ الدىمەن تۋعان جەرىمدە وتكەنىن قالادىم, مىنە, قوستانايلىقتارعا سوڭعى كەزدەگى تۋىندىلارىمدى ۇسىنىپ وتىرمىن, - دەدى سۋرەتشى. ونىڭ شىعارمالارى كوپتەگەن حالىقارالىق كورمەلەرگە قاتىستى. سۋرەتشى 2001 جىلدان باستاپ مەملەكەتتىك رامىزدەر جونىندەگى مەملەكەتتىك كوميسسيانىڭ مۇشەسى.
ءنازيرا جارىمبەتوۆا,
"ەگەمەن قازاقستان".
قوستاناي
