ۋنيۆەرسيادا الاۋىن الىپ جۇرۋشىلەر انىقتالۋعا جاقىن

بۇگىن الماتى قالاسىنداعى 28-ءشى دۇنيەجۇزىلىك قىسقى ۋنيۆەرسيادا-2017 ويىندارىنىڭ ەستافەتا الاۋىن الىپ جۇرۋشىلەردى ىرىكتەۋدىڭ قورىتىندى كەزەڭى باستالدى, شارا 16 جەلتوقساندا اياقتالادى, دەپ حابارلايدى BNews.kz. الاۋدى الىپ جۇرۋگە 17-28 جاس ارالىعىنداعى عىلىم, مادەنيەت جانە سپورت سالالارىندا جەتىستىككە جەتكەن ستۋدەنتتەر قاتىسا الادى. ىرىكتەۋدىڭ ءبىرىنشى كەزەڭى 1 قىركۇيەكتە باستالدى جانە رەسپۋبليكانىڭ بارلىق جوعارى وقۋ ورىندارىن قامتىدى. ۋنيۆەرسيتەتتەر ءوز وتىنىشتەرىن ىشكى بايقاۋ قورىتىندىسى بويىنشا تاپسىردى. ەكىنشى كەزەڭدە راسىمدەرگە وبلىس ورتالىقتارىندا ەستافەتا وتكىزۋمەن اينالىساتىن وڭىرلىك شتابتار قوسىلدى. شتابتاردىڭ مىندەتى – الاۋدى الىپ جۇرۋشىلەردى ىرىكتەۋدىڭ جالپى جۇمىس بارىسىن باقىلاپ, بايقاۋ كەزىندە شىنىمەن دە ماڭىزدى ۇمىتكەرلەردى جىبەرىپ الماۋ. بۇدان وزگە, ەكىنشى كەزەڭ اياسىندا جۇلدىزدى قاتىسۋشىلاردىڭ – الداعى وتكەن ۋنيۆەرسيادالاردىڭ جەڭىمپازدارى, سپورت, عىلىم, مادەنيەت جۇلدىزدارىنىڭ قۇرامى انىقتالدى. ءۇشىنشى كەزەڭدە www.torchrelay.kz سايتىندا ءار نيەت بىلدىرگەن ادام ساۋالنامانى تولتىرىپ, الاۋدى الىپ جۇرۋشىلەر مارتەبەسىندە الاۋ ەستافەتاسىنا قاتىسۋعا ءوتىنىم بەرە الادى. وسىلايشا, قالعان بوس ورىنداردى تولتىرۋ جوسپارلانعان. ۇيىمداستىرۋشىلار وسى كەزەڭدە ءبىرىنشى الاۋدى الىپ ءجۇرۋشى دميتري بالاندين سياقتى بەلگىلى بولماسا دا, جەتىستىكتەرى بار ستۋدەنتتەردىڭ جاڭا ەسىمدەرىن تارتۋ مۇمكىن بولاتىنىن ايتتى. بۇل وقيعالار دا قىزىقتىرىپ, قازاقستاندىق جاستاردى جاڭا جەتىستىكتەرگە ىنتالاندىرادى. مىسالى, 7-ءشى ازيا ويىندارى اياسىنداعى ەستافەتادا وزەندە باتىپ بارا جاتقان بالانى قۇتقارىپ قالعان قوستاناي وبلىسىنىڭ دەنە شىنىقتىرۋ مۇعالىمى قاھارمان بولعان بولاتىن. بۇل سپورتتىڭ ءبىر ادامنىڭ ءومىرىن وزگەرتىپ قانا قويماي, باسقا ادامنىڭ ءومىرىن قۇتقارا الاتىنىن دالەلدەيتىن كوپتەگەن مىسالداردىڭ ءبىرى. الاۋدى الىپ جۇرۋشىلەردى ىرىكتەۋ 16 جەلتوقساندا اياقتالادى. رەسپۋبليكالىق كوميسسيا بەكىتكەننەن كەيىن ءتىزىم www.torchrelay.kz سايتىندا جاريالانادى. الاۋ ەستافەتاسى 25 قاڭتاردا استانا قالاسىندا باستالادى. الاۋ جاعۋدىڭ جەكە سالتاناتى جانە ەستافەتانىڭ ءوز كەزەڭى ءار وبلىس ورتالىعىندا وتەدى. سودان كەيىن ءوز الاۋلارىن ۋنيۆەرسيادانىڭ اشىلۋ سالتاناتىندا قوسۋ ءۇشىن 16 الاۋدى الىپ ءجۇرۋشى الاۋدى الماتىعا جەتكىزەدى. بارلىعى 1 000 الاۋدى الىپ ءجۇرۋشى ىرىكتەلەدى: وبلىس ورتالىقتارىندا جانە استانا قالاسىندا 60-تان, ستۋدەنتتىك ويىندار استاناسىنان 100 ادام قاتىسادى.