اليمەنت تولەۋدەن جالتارعاندار قاماۋعا الىندى

استانادا جيىرمادان استام ادام قاماۋعا الىندى, دەپ حابارلايدى bnews.kz. ولار تۋعان پەرزەنتىنە اليمەنت تولەمەي, جاۋاپكەرشىلىكتەن جالتارعانى ءۇشىن وسىنداي جاعدايعا ۇشىراپ وتىر. الماتى اۋدانىنىڭ پروكۋرورلارى ادىلەت باسقارماسىمەن بىرلەسىپ «ءوز بالاڭا كومەكتەس» اتتى شارا وتكىزدى. ونىڭ اياسىندا جالپى سوماسى ميلليون تەڭگەدەن استام قارجى ءوندىرۋ كوزدەلگەن. الماتى اۋدانىنىڭ پروكۋرورلارى مەن سوت ورىنداۋشىلار مۇنداي فورماتتاعى اكتسيانى العاش وتكىزىپ وتىرعان جوق. جاۋاپسىز اكەلەردى تابۋ قيىننىڭ قيىنى, ايتسە دە ناتيجە جامان ەمەس. «ءبىر اپتا ىشىندە جۇزدەگەن مەكەن-جايلاردى ارالاپ شىقتىق. بىرلەسىپ, ناتيجەسىندە 20 بورىشكەردى اكىمشىلىك جاۋاپكەرشىلىككە تارتتىق. ودان بولەك بورىشكەرلەر تاراپىنان اليمەنت تولەمدەرىن ءىشىنارا تولەۋ دەرەكتەرى كەزدەسىپ جاتىر. اليمەنت ءوندىرىلىپ جاتىر. ونىمەن قوسا بورىشكەرلەردى قىلمىستىق جاۋاپكەرشىلىككە تارتۋ شارالارى جالعاسۋدا», –  دەيدى استانا قالاسى الماتى اۋدانىنىڭ پروكۋرورى شىڭعىس وتەمىس. جينالىپ قالعان قوماقتى قارىزىن تولەمەي جۇرگەندەردىڭ تۋىستارى كوبىنە ولاردىڭ جاۋاپسىز ارەكەتىنەن بەيحابار بولىپ جاتادى. سوندىقتان بارىنشا قورعاۋعا ۇمتىلادى. زاڭ اياسىندا مىندەتتەلگەن تالاپتى ورىندامايتىن جانداردىڭ ءتۇرلى ايلاعا باراتىنى جاسىرىن ەمەس. ولاردى جاۋاپكەرشىلىككە تارتۋدىڭ دا امالدارى بار دەيدى سوت ورىنداۋشىلار. «اكىمشىلىك پوليتسيا باسقارماسىنا بورىشكەرلەردىڭ كولىگىن توقتاتۋ تۋرالى اقپاراتتى جىبەرەمىز. وسىدان كەيىن كولىك ايىپ تۇراعىنا قويىلادى. ەگەر يەسى اليمەنتىن تولەيتىن بولسا, تەحنيكا قايتارىلادى. كەي جاعدايدا كولىك ساتىلىپ وندىرىلگەن قارجى ارىزدانۋشىعا بەرىلەدى. ايىپتىلار مۇندايعا دا كەلىسىپ جاتادى», – دەيدى استانا قالالىق ادىلەت دەپارتامەنتى اليمەنت تولەمدەرىن ءوندىرۋ ءبولىمىنىڭ سوت ورىنداۋشىسى ايدانا جىلقىباەۆا تەكسەرۋ وتكىزىلگەن 3 اپتادا قۇقىق قورعاۋشىلار جۇزدەگەن مەكەن-جايعا باس سۇقتى. اليمەنت تولەمەگەن 23 ادام قاماۋعا الىنعان. ولار 5-8 كۇن ارالىعىندا تەمىر توردىڭ ار جاعىندا وتىرادى. قازىر ادىلەت باسقارماسىنىڭ قاراۋىندا 8 مىڭعا جۋىق ءىس جاتىر. ال قارىزدىڭ كولەمى 180 ميلليون تەڭگە كولەمىندە. پروكۋرورلار جاۋاپكەرشىلىكتەن قاشقان ءاربىر اكەنى تاۋىپ, جازاعا تارتۋعا مۇددەلى. ال "ەكى قولعا ءبىر كۇرەك تاپپاي ءجۇرمىن" دەپ سىلتاۋ ايتقانداردى استاناداعى ءىرى قۇرىلىس نىساندارىندا جۇمىس ىستەۋگە مىندەتتەمەك.