اۋەسقوي بوكستان كاسىپقويعا اۋىسۋدى قيىنداتامىز – ايتجانوۆ

پاۆلوداردا ءوتىپ جاتقان بوكستان ەل چەمپيوناتى اياسىندا قازاقستان ۇلتتىق قۇراماسىنىڭ باس باپكەرى مىرزاعالي ايتجانوۆ وبلىستىق جانە قالالىق كوماندالاردىڭ جاتتىقتىرۋشىلارىنا سەمينار وتكىزدى, دەپ حابارلايدى قازاقستان بوكس فەدەراتسياسىنىڭ ءباسپاسوز قىزمەتى. سەمينار بارىسىندا باس باپكەر الەمدىك اۋەسقوي جانە كاسىبي بوكس اراسىنداعى باسەكەلەستىكتىڭ ارتىپ كەلە جاتقاندىعىن, وسىعان بايلانىستى ءاىۆا-نىڭ الەۋمەتتىك باعدارلامالارىنا سپورتشىلاردى قورعاۋ جانە قولداۋ شارالارى ەنگىزىلگەندىگىن اتاپ ءوتتى. سونىمەن قاتار, ول ريو وليمپياداسىنان كەيىن قابىلدانعان تورەلىك ەتۋدىڭ جاڭا جۇيەسىن, ۇپايلاردى ساناۋ جۇيەسىن ءتۇسىندىرىپ بەردى. ءوز كەزەگىندە م. ايتجانوۆ وليمپيادا ويىندارىنان كەيىن سپورتشىلارمىزدىڭ كاسىبي بوكسقا اۋىسۋعا قۇلشىنىس تانىتۋى جيىلەپ كەتكەندىگىن دە باسا ايتتى. «ءبىز ولاردىڭ سپورتتىق مانساپ جولىن دەربەس تاڭداۋ جاساۋىنا شەكتەۋ قويا المايمىز. بىراق, مەملەكەتتىڭ ولاردى دايىنداۋعا قانشاما كۇش پەن قارجى جۇمساعاندىعىن قاپەردەن شىعارماۋ قاجەت. سىزدەردىڭ مىندەتتەرىڭىز  ولارعا اۋەسقوي بوكستا مۇددەلەرى ءار ۋاقىتتا قورعالاتىندىعىن, ءتىپتى ۇلكەن سپورتتان كەتسە دە قولداۋعا يە بولاتىندىعىن ءتۇسىندىرۋ», – دەدى ول. ونىڭ ايتۋىنشا, 2017 جىلدان باستاپ سپورتشىلاردىڭ اۋەسقويدان كاسىبي بوكسقا توسىننان اۋىسىپ كەتۋىنە جول بەرىلمەيتىندى. بۇل رەتتە قازاقستان بوكس فەدەراتسياسى ارنايى ەرەجە ەنگىزەتىندىگىن ايتتى. اتالعان ەرەجەگە سايكەس سپورتشى كاسىبي بوكسقا اۋىسۋ ويىن فەدەراتسياعا ەسكەرتۋگە مىندەتتى جانە كەلىسىم العاننان كەيىن عانا كەتە الادى.