نيازىمبەتوۆتىڭ قۇرمەتىنە بالالار كيىمى شىعارىلدى

ورتالىق كوممۋنيكاتسيالار قىزمەتىندە «حالىق ماركاسى» قازاقستاندىق تاۋارلار مەن قىزمەتتەردىڭ ساپاسىن باقىلاۋ جۇيەسى فەدەراتسياسى» زاڭدى تۇلعالار بىرلەستىگىنىڭ پرەزيدەنتى ريمما تاجىباەۆانىڭ قاتىسۋىمەن ءباسپاسوز كونفەرەنتسياسى ءوتتى. سپيكەر وتاندىق ءونىمنىڭ قازىرگى ۋاقىتتاعى دامۋ قارقىنى جونىندە اڭگىمەلەدى. «استانادا جاقىندا اشىلعان «حالىق ماركاسى» ساۋدا ورتالىعى قازاقستاندىق تاۋارمەن تولىعۋدا. ءبىر جەرگە توپتاسقان تەك ۇلتتىق برەندتى تۇتىنۋشىلاردىڭ قاتارى كۇن ساناپ ارتىپ كەلەدى. اشىلعانىنا بىرەر اي عانا بولعان بۇل ساۋدا الاڭىنداعى تاۋارلاردىڭ بارلىعى وتاندىق وندىرۋشىلەردىڭ قولىنان شىققان. شەتەلدىك ونىمدەردەن كەم تۇسپەيدى, تاۋارلار ساپالى ءارى قولجەتىمدى», – دەدى ر.تاجىباەۆا. ونىڭ ايتۋىنشا, وتاندىق ءونىمنىڭ باسىن قوسقان الاڭنىڭ ارتىقشىلىعى, ساتۋشىلار ورىندى جالعا العانى ءۇشىن اقى تولەمەيدى, تاۋارىن تەگىن قويادى. «قازىرگى تاڭدا تاۋار اينالىم كولەمى 30 ميلليوننان استام. بۇگىنگە دەيىن بۇل پاۆيلوندا 100 شاقتى كومپانيا ءوز ورنىن الىپ ۇلگەردى. 10 مىڭنان استام وتاندىق تاۋاردىڭ ۇلگىسى بار. سونداي-اق 500 برەندتى تاۋار ورنالاستىرۋ جوسپارلانۋدا. سول ارقىلى پاۆيلون 100 مىڭنان استام وتاندىق تاۋارعا تولىعادى, – دەپ مالىمدەدى سپيكەر. – قازىر ءبىز ەكسپو-2017 قارساڭىندا قالانىڭ تۋريستىك كارتاسىنا ەندىك, ويتكەنى كەلۋشى قوناقتاردىڭ ءبارى, سونىڭ ىشىندە شەتەلدىك ازاماتتار قازاقستاندىق ءونىمدى ىزدەيتىن بولادى. اتالمىش كارتاعا تەك وتاندىق ونىمدەر ساتاتىن ساۋدا ورىندارى ەنەدى. سونداي-اق قالا ىشىندە تەك وتاندىق تاۋاردى ساۋدالايتىن 7 Duty Free ماركەتى اشىلادى». سونداي-اق, شارا بارىسىندا ماڭعىستاۋ وبلىسىنىڭ قولداۋىمەن, وليمپيادانىڭ ەكى دۇركىن كۇمىس جۇلدەگەرى ادىلبەك نيازىمبەتوۆتىڭ قۇرمەتىنە «ZIBROO FOR اDOKA» بالالار سپورتتىق كيىمدەرىن تانىستىرۋ ءراسىمى ءوتتى. ايدار ورىسباەۆ, "ەگەمەن قازاقستان".