مەملەكەتتىك رامىزدەرگە ارنالعان جيىن ءوتتى

« ۇلى دالا ەلى – تاۋەلسىزدىكتىڭ 25 نەگىزى» اتتى جۇلدىزدى 25 كۇن اياسىندا مەملەكەتتىك حاتشى گۇلشارا ابدىقالىقوۆانىڭ تورايىمدىلىعىمەن مەملەكەتتىك رامىزدەر جانە ۆەدومستۆولىق جانە ولارعا تەڭەستىرىلگەن وزگە دە ناگرادالار گەرالديكاسى ماسەلەلەرى جونىندەگى رەسپۋبليكالىق كوميسسيانىڭ كەڭەيتىلگەن وتىرىسى ءوتتى. وتىرىسقا ورتالىق جانە جەرگىلىكتى اتقارۋشى ورگانداردىڭ باسشىلارى, قوعام قايراتكەرلەرى, مادەنيەت جانە سپورت سالالارىنىڭ وكىلدەرى, عالىمدار قاتىستى. جيىندا ءسوز العان گۇلشارا ابدىقالىقوۆا قازاقستان تاۋەلسىزدىگىنىڭ 25 جىلدىعىن مەرەكەلەۋ بويىنشا تۇجىرىمداما جاسالعانىن, وعان سايكەس, تاۋەلسىزدىكتىڭ شيرەك عاسىرعا تولعان تورقالى تويىن اتاپ ءوتۋ جونىندەگى ءىس-شارالار جوسپارلارى قابىلدانعانىن اتاپ ءوتتى. «21 قاراشا مەن 15 جەلتوقسان ارالىعىندا وتەتىن ءىس-شارالار «تاۋەلسىزدىكتىڭ 25 جۇلدىزدى كۇنى» اياسىندا وتەدى. وسىعان وراي, كۇنى كەشە ەلىمىزدىڭ 16 جاسقا تولعان ازاماتتارىنا جەكە كۋالىكتەرىن سالتاناتتى تۇردە تابىستاۋ ءراسىمى وتكىزىلسە, بۇگىنگى جيىن تاۋەلسىزدىكتىڭ باستى نىشانى – مەملەكەتتىك رامىزدەرگە ارنالىپ وتىر», – دەدى گۇلشارا ناۋشاقىزى. سونىمەن قاتار, ول ەل تاۋەلسىزدىگىنىڭ 25 جىلدىعىن مەرەكەلەۋ اياسىندا بيىلعى جىلدىڭ ءساۋىر ايىندا وتكەن قازاقستان حالقى اسسامبلەياسى كەڭەسىنىڭ «تاۋەلسىزدىك. كەلىسىم. بولاشاعى ءبىرتۇتاس ۇلت» اتتى 24-ءىنشى سەسسياسىندا «ماڭگىلىك ەل» پاتريوتتىق اكتىسىنىڭ قابىلدانعانىنا توقتالا كەلە, بۇل تاريحي قۇجاتتا ماڭگىلىك ەلدىڭ مىزعىماس 7 تۇعىرىن نىعايتۋ, ساقتاۋ, ۇرپاقتان ۇرپاققا امانات ەتۋ مىندەتتەرى بەلگىلەنگەنىن جەتكىزدى. «ولار تاۋەلسىزدىك جانە استاناعا, جالپىۇلتتىق بىرلىككە, بەيبىتشىلىك پەن كەلىسىمگە, زايىرلى مەملەكەت جانە جوعارى رۋحانياتقا, يننوۆاتسيا يىرىمدەرىنە, تۇراقتى ەكونوميكالىق وسىمگە, جالپىعا ورتاق ەڭبەك قوعامىنا, تاريحتىڭ, مادەنيەت پەن ءتىلدىڭ ورتاقتىعىنا, ۇلتتىق قاۋىپسىزدىك پەن قازاقستاننىڭ جالپى الەمدىك جانە وڭىرلىك پروبلەمالارىن شەشۋگە تىكەلەي بايلانىستى», - دەدى مەملەكەتتىك حاتشى. جيىن اياسىندا گۇلشارا ابدىقالىقوۆا ەلىمىزدىڭ بارلىق وڭىرىندە مەملەكەتتىك رامىزدەرگە ارنالعان بايقاۋلاردىڭ, پاتريوتتىق ءىس-شارالاردىڭ جۇرگىزىلىپ جاتقانىن ايتا كەلە: «مەملەكەتتىك رامىزدەر – ەل ىشىندەگى تۇراقتىلىقتىڭ, قوعامدىق كەلىسىم مەن پاتريوتتىق تاربيەنىڭ اسا ماڭىزدى قۇرالى», – دەدى. وتىرىستا ەلتاڭبا اۆتورى جانداربەك مالىبەكوۆ تۋدىڭ, ەلتاڭبانىڭ, ءانۇراننىڭ قازاقستاننىڭ, ونىڭ تاۋەلسىزدىگىندە الاتىن ورنىنا توقتالسا, قوعام قايراتكەرى مىرزاتاي جولداسبەكوۆ العاش تاۋەلسىزدىك العان جىلدارداعى ەستەلىكتەرىمەن ءبولىستى. «وڭاي بولعان جوق. مۇنى ۇرپاق ءبىلۋى كەرەك. قۋانعان دا, قورىققان دا بىردەي دەگەن. سول كەزدە جۇرتتىڭ ەسى شىعىپ كەتتى. سونىڭ ءبارىن ۇستاپ, دۇرىس قالىپقا سالۋ, ارينە, وڭايعا تۇسكەن جوق. بۇل جەردە ەلباسىنىڭ ءتوزىمى دە جەتتى, اقىلى مەن پاراساتى دا جەتتى. سونىڭ ارقاسىندا بابالارىمىز, قولىنا قارۋ العان باتىرلارىمىز, كوسەمدەرىمىز, دانالارىمىز, اقىندارىمىز, جىراۋلارىمىز, حاندارىمىز جەتە الماعان, وسىنىڭ جولىندا باسىندا  باسىن بايگەگە تىككەن, بىراق, جانى قيىلعان, ءومىرى وتكەن تاۋەلسىزدىككە ءبىز, قازاق حالقى جەتتىك», – دەدى مىرزاتاي جولداسبەكوۆ. ونىڭ ايتۋىنشا, ول جىلدارى قازاق حالقىنىڭ سانى 39 پايىز بولعان ەكەن. «سول كەزدە ءبىزدى بۇرىننان بەرى قازاقستاندا ءومىر ءسۇرىپ جاتقان وزگە ۇلت وكىلدەرى دە قولدادى. ءبىز مۇنى ەشقاشان ۇمىتپاۋىمىز كەرەك. قازاقستاننىڭ جەلبىرەگەن كوك تۋىنىڭ تۇعىرى حالقىمىزدىڭ مىزعىماس بىرلىگى مەن ىنتىماعىنىڭ ارقاسىندا بيىكتەپ تۇر», – دەدى مىرزاتاي جولداسبەكوۆ. ءلايلا ەدىلقىزى, «ەگەمەن قازاقستان».