قوستانايدا ساتيريك جازۋشى عۇمار احمەتچيننىڭ 75 جاسقا تولۋىنا وراي ونىڭ شىعارماشىلىعىنا ارنالعان ادەبي كەش ءوتتى. جازۋشىعا وبلىس اكىمىنىڭ ورىنباسارى مارات جۇندىباەۆ وبلىس اكىمى ارحيمەد مۇحامبەتوۆتىڭ قۇتتىقتاۋىن جەتكىزىپ, حالقىمىزدىڭ سالتىمەن شاپان جاۋىپ, سىي-سياپات كورسەتتى.
وبلىستىق ارداگەرلەر كەڭەسىنىڭ توراعاسى كەنجەبەك ۋكين اعا بۋىن وكىلدەرىنىڭ قۇتتىقتاۋىن جەتكىزدى. اقىندار سەرىكباي وسپانوۆ پەن ناعاشىباي مۇقاتوۆ جازۋشىنىڭ شىعارمالارىنا توقتالدى. ولار عۇمار اعانى قوستانايداعى قالام ۇستاعانداردىڭ بىرنەشە تولقىنىنا ۇستاز دەپ اتادى. ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ پرورەكتورى الماس ابسادىقوۆ توي يەسىنە ءبىلىم ورداسى ۇجىمىنىڭ اتىنان جىلى لەبىزىن ارنادى.
عۇمار احمەتچين تەك پروزا عانا جازبايدى, ولەڭ اۋىلىنا دا سوعىپ وتىرادى. كەشتە وبلىستاعى ءى.وماروۆ اتىنداعى قازاق دراما تەاترىنىڭ جاس ارتىستەرى جازۋشىنىڭ ساتيرالىق جانە ليريكالىق ولەڭدەرىن ناقىشىنا كەلتىرە وقىدى. كورەرمەندەر كومپوزيتورلار باقىتجان ساۋەكەنوۆتىڭ, قاليبەك دەرپسالديننىڭ عۇمار احمەتچيننىڭ سوزىنە جازىلعان اندەرىن تىڭدادى. قاليبەك «ارقانىڭ اپپاق قىزى» ءانىن ءوزى ناقىشىنا كەلتىرە ورىندادى.
كەش سوڭىندا توي يەسى عۇمار احمەتچين ءوز شىعارمالارىنان ۇزىندىلەر وقىدى. سونىمەن قاتار ول تاۋەلسىز ەلىمىزبەن بىرگە ءوسىپ كەلە جاتقان جاستارعا وسيەت سوزدەرىن دە ارنادى. كەشكە كەلگەندەر جازۋشى شىعارماشىلىعى بويىنشا ۇيىمداستىرىلعان شاعىن كورمەنى دە تاماشالادى.
ءنازيرا جارىمبەتوۆا,
"ەگەمەن قازاقستان".
قوستاناي
