ماڭعىستاۋ وڭىرىنەن التىن تەڭگەلەر تابىلدى

ماڭعىستاۋ وبلىسىنىڭ تۇرعىنى XII-XIII عاسىرعا جاتاتىن التىن تەڭگەلەر كومبەسىن تاپتى, دەپ حابارلايدى lada.kz. عالىم پاۆەل پەتروۆتىڭ ايتۋىنشا, بۇل قازىنا انۋشتەگينيد الا اد-دين تەكەش پەن مۇحاممەد يبن تەكەش حورەزمشاحتار اۋلەتىنە تيەسىلى بولۋى مۇمكىن. ال ارحەولوگ اندرەي استافەۆ بۇل اقشانىڭ سوعىلعان ورنى ماڭعىشلاق قالاسى بولۋى ىقتيمال دەگەن بولجام جاساپ وتىر. ماڭعىستاۋدىڭ ەجەلگى قونىستارىن زەرتتەۋ ازيا ەلدەرى مەن شىعىس ەۋروپا اراسىن جالعاعان ۇلى جىبەك جولىنىڭ سولتۇستىك تارماعىن زەرتتەۋدىڭ باستى قۇراۋشى عىلىمي تاقىرىبى بولىپ تابىلادى. الايدا, اندرەي استافەۆتىڭ ايتۋىنشا, بۇل تاقىرىپقا تاريحشىلار مەن ارحەولوگتار اسا ءمان بەرە قويماعان. پاۆەل پەتروۆتىڭ ساراپتامالىق قورىتىندىسى بويىنشا, الەمنىڭ ەش مۋزەيىندە مۇنداي ءبىر ورىننان تابىلعان مونەتالار كەشەنى جوق. اتالعان كەشەندى عالىم قازاقستاننىڭ ۇلتتىق بايلىعى دەپ اتادى. تەكەش حاننىڭ بيلىگى تۇسىندا حورەزم ورتالىق ازيانىڭ قۋاتتى مەملەكەتتەرىنىڭ ءبىرى بولدى. ونىڭ شەكاراسى ارال تەڭىزىنەن پارسى بۇعازىنا دەيىن, شىعىسىندا پاميردەن يران تاۋلى ولكەسىنە دەيىن سوزىلدى. تەكەش بيلىك ەتكەن جىلدارى حورەزم اۋماعى ەكى ەسە ۇلعايعان. ودان بولەك, تەكەش نەگىزىن قالاعان كىتاپحانا تۋرالى دا مالىمەتتەر ساقتالعان. تەكەش حورەزمشاح قايتىس بولعان سوڭ, تاققا ونىڭ كىشى ۇلى الا اد-دين مۇحاممەد وتىرىپ, حورەزم اۋماعىن ودان ءارى كەڭەيتتى.