«قايسار» كومانداسىنا جاڭا جاتتىقتىرۋشى كەلدى

«قايسار» فۋتبول كلۋبى بولگاريالىق ستويچو ملادەنوۆپەن "1+1" جۇيەلى كەلىسىم-شارتقا وتىردى. ەگەر كلۋب 2017 جىلدى ناتيجەلى اياقتاسا, كەلىسىم-شارت اۆتوماتتى تۇردە تاعى ءبىر جىلعا سوزىلادى. بۇل تۋرالى اتالعان فۋتبول كلۋبىنىڭ رەسمي سايتى حابارلادى. قىزىلوردالىق كلۋبتىڭ جاڭا جاتتىقتىرۋشىسى — ستويچو ملادەنوۆ. ول 1957 جىلى 12 ساۋىردە بولگارياداعى پلوسكي اۋىلىندا تۋعان. 1974 جىلدان باستاپ «ديميتروۆگراد» فۋتبول كومانداسىندا ويناپ, كەيىن «بەروە» مەن سوفياداعى تسسكا-عا اۋىسقان. ودان بولەك «بەلەنەنسەش», «ۆيتوريا سەتۋبال», «ەشتوريل», «وليانەنزە» سىندى كوماندالاردا ويناعان ول 37 جاسىندا مانسابىن اياقتادى. ول ءوزىنىڭ فۋتبولداعى 20 جىلدىق ەڭبەگىندە بارلىعى 430 كەزدەسۋ وتكىزىپ, 185 گول سوققان. ملادەنوۆتىڭ جاتتىقتىرۋشىلىق مانسابىندا «ەشوتريل», «ويانەنزە», «بەلەنەنسەش», «ليتەكس», «كالەتەيا», تسسكا (بولگاريا), «ال-احلي» (ساۋد ارابياسى), «ال-ەتيفاك» (ساۋد ارابياسى), ەنپپي (ەگيپەت), «ال-يتيحاد» (ەگيپەت) فۋتبول كلۋبتارى بار. ال, 2016 جىلدىڭ ماۋسىم ايىنان باستاپ ول «اتىراۋ» كلۋبىن باسقارعان بولاتىن. ايتا كەتەيىك, «قايسار» فۋتبول قۇراماسى جاڭا جاتتىقتىرۋشىمەن وقۋ-جاتتىعۋ جيىنىن جەلتوقسان ايىنان باستاپ وتكىزەدى.