پاۆلودار وبلىسىندا 350 جوباعا 4,2 ملرد تەڭگە بولىنگەن

2016 جىلى پاۆلودار وبلىسىندا «جۇمىسپەن قامتۋدىڭ 2020 جول كارتاسى» (بۇدان ءارى - «جقجك 2020») باعدارلاماسىنىڭ جۇمىسپەن قامتۋدى ينفراقۇرىلىمدى جانە تۇرمىستىق-كوممۋنالدىق شارۋاشىلىقتى دامىتۋ ارقىلى قاراستىراتىن ءبىرىنشى باعىتىن ىسكە اسىرۋعا رەسپۋبليكالىق بيۋدجەتتەن 4,2 ملرد. تەڭگە ءبولىندى. وسى قاراجات ەسەبىنەن 350 جوبانى ىسكە اسىرۋ, ونىڭ ىشىندە 345 ينفراقۇرىلىمدىق نىساننىڭ جانە 5 دارىگەرلىك امبۋلاتوريانىڭ قۇرىلىسى جوسپارلانعان. بۇل تۋرادى قر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ ءباسپاسوز قىزمەتى حابارلادى. جوندەلەتىن عيماراتتاردىڭ 91-ءى - ءبىلىم بەرۋ, 40 – مادەنيەت, 34 – دەنساۋلىق ساقتاۋ نىساندارىن, 34 – كولىك ينفراقۇرىلىمىن, 23 – الەۋمەتتىك قورعاۋ, 21 – سپورت نىساندارىن, 16 – كوممۋنالدىق – ينجەنەرلىك ينفراقۇرىلىمىن جانە 86-ءسى اباتتاندىرۋ جانە كوگالداندىرۋ جۇمىستارىن قامتيدى. بۇگىنگى كۇنى بارلىق جوبالار ىسكە اسىرىلۋدا, 2366 ادام جۇمىسقا تۇردى, ولاردىڭ 1243-ءى «جقجك 2020» باعدارلاماسىنا قاتىسۋشىلار. 2015 جىلى «جقجك 2020» باعدارلاماسىنىڭ ءبىرىنشى باعىتىن ىسكە اسىرۋعا 13,7 ملرد. تەڭگە بولىنگەنىن, جالپى رەسپۋبليكا بويىنشا 588 ينفراقۇرىلىمدىق جوبالار جۇزەگە اسىرىلىپ, 8,6 مىڭ ادام جۇمىسقا ورنالاستىرىلعانىن ەستەرىڭىزگە سالامىز. 2016 جىلى «جقجك 2020» باعدارلاماسىنىڭ ءبىرىنشى باعىتىن ىسكە اسىرۋعا 80,1 ملرد. تەڭگە ءبولىندى. بۇل قاراجات جوبالاردىڭ سانى ەسكەرىلە وتىرىپ, جەرگىلىكتى اتقارۋشى ورگانداردىڭ تاپسىرىستارى نەگىزىندە وڭىرلەر اراسىندا بولىنەدى.