ەلەكتر جەلىلىك كومپانيالارىن كەڭەيتۋ ماسەلەسىن قر ۇكىمەتىنىڭ وتىرىسىندا ۇسىنىلعان «ەلەكتر ەنەرگياسىنىڭ ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسى رەتتەيدى. زاڭ جوباسىندا ەلەكتر تاراتۋشى ۇيىمدارعا 2018-2022 جىلدار ارالىعىندا كەزەڭ-كەزەڭىمەن ەنگىزىلەتىن تالاپ قاراستىرىلادى.
ازىرلەنگەن زاڭ جوباسى قازاقستان رەسپۋبليكاسىنىڭ 2 كودەكسىنە جانە 3 زاڭىنا وزگەرىستەر مەن تولىقتىرۋلار ەنگىزۋدى كوزدەيدى. ولار – سالىق كودەكسى, اكىمشىلىك قۇقىق بۇزۋشىلىق تۋرالى كودەكس, «ەلەكتر ەنەرگەتيكاسى تۋرالى», «تابيعي مونوپوليالار جانە رەتتەلەتىن نارىقتار تۋرالى», سونداي-اق «مەملەكەتتىك م ۇلىك تۋرالى» زاڭدار. «ەنەرگيا بەرۋشى ۇيىمداردى ىرىلەندىرۋ ماسەلەسى زاڭ جوباسىندا 5 نەگىزگى مەحانيزم بويىنشا قارالدى, ولار: يەسىز ەلەكتر جەلىلەرىن قابىلداعان كەزدە ەنەرگيا بەرۋشى ۇيىمداردى كورپوراتيۆتىك تابىس سالىعىنان جانە م ۇلىك سالىعىنان بوساتۋ; ەنەرگيا بەرۋشى ۇيىمدار ءۇشىن تابيعي مونپوليالار سالاسىنداعى زاڭنامادا كوزدەلگەن تىيىم سالۋدى الىپ تاستاۋ; ەلەكتر جەلىلەرىن كەڭەيتكەن كەزدە ەنەرگيا بەرۋشى ۇيىمدار تاريفتەرىنىڭ شەكتى دەڭگەيلەرىن قايتا قاراۋ مۇمكىندىگى; مەملەكەتتىك كاسىپورىندار بالانسىنداعى ەلەكتر جەلىلەرىن بەرۋ; ەنەرگيا بەرۋشى ۇيىمداردىڭ قىزمەتىنە تالاپتار ەنگىزۋ», - دەدى ق.بوزىمباەۆ.سونىمەن قاتار ەنەرگەتيكا ءمينيسترى ەلىمىزدە انىقتالعان 4 580 كم-دەن استام يەسىز جاتقان ەلەكتر جەلىسى ماسەلەسى شەشىلىپ جاتقانىن مالىمدەدى. بۇدان بولەك, 1300-دەن اسا ترانسفورماتورلىق قوسالقى ستانتسيانىڭ بار ەكەنى بەلگىلى بولدى.
«وسىعان بايلانىستى زاڭ جوباسى ىنتالاندىرۋ مەحانيزمىن قاراستىرادى. ناقتىراق توقتالار بولساق: ەنەرگيا بەرۋشى ۇيىمدار يەسىز ەلەكتر جەلىلەرىن ءوز بالانسىنا تەگىن العان ۋاقىتتا كورپوراتيۆتىك تابىس سالىعىنان (20%) جانە م ۇلىك سالىعىنان (1,5%) بوساتىلادى. وسى نورمالاردى ەنگىزۋ الدىمەن يەسىز ەلەكتر جەلىلەرىن ءوز بالانسىنا قابىلداۋى ءۇشىن ەنەرگيا بەرۋشى ۇيىمداردىڭ قىزىعۋشىلىعىن ارتتىرۋعا قاجەت», - دەدى ەنەرگەتيكا ءمينيسترى. قانات بوزىمباەۆتىڭ ايتۋىنشا, سايىپ كەلگەندە 2020 جىلعا تامان ەنەرگيا ءوندىرۋشى جانە ەنەرگيا بەرۋشى ۇيىمنىڭ سانى 120-130-دى قۇرايدى, ەنەرگيامەن جابدىقتاۋ سەنىمدىلىگى كۇشەيەدى, تۇتىنۋشىلاردىڭ ەلەكتر ەنەرگياسىن قولدانعانى ءۇشىن تولەماقى قىزمەتى ازايادى.وڭىرلىك ەلەكتر جەلىلىك كومپانيالاردى ىرىلەندىرۋ «100 ناقتى قادام» ۇلت جوسپارىنىڭ» 51-قادامىندا كورسەتىلگەن.
ايان ءابدۋالي,
"ەگەمەن قازاقستان".
