الماتىنى قاردان تازالاۋعا قوسىمشا 400 ملن بولىنبەك

بۇگىن ۇكىمەتتىڭ سەلەكتورلىق رەجىمدەگى وتىرىسىندا الماتى قالاسىنىڭ اكىمى باۋىرجان بايبەك شاھاردى قاردان تازارتۋعا جەرگىلىكتى بيۋدجەتتەن قوسىمشا 400 ملن تەڭگە بولىنەتىنىن جەتكىزدى, دەپ حابارلايدى قازاقپارات. ۇكىمەت وتىرىسىندا ءسوز العان باۋىرجان بايبەك: «قاراشانىڭ 16-20-سى ارالىعىندا قالاعا جاۋعان قاردىڭ قالىڭدىعى 60-تان 80 سانتيمەترگە دەيىن جەتتى. بۇل ورتاشا ايلىق نورمادان ءۇش ەسەگە ارتىق. وسىنى ەسكەرە وتىرىپ, قالا كوشەلەرىن قاردان تازالاۋ جۇمىستارى كۇشەيتىلگەن رەجىمدە جۇرگىزىلۋدە. تولىقتاي العاندا, قار تازالاۋ جۇمىستارىنا قالانىڭ بارلىق كوممۋنالدىق شارۋاشىلىقتارى, توتەنشە جاعدايلار دەپارتامەنتى, ەنەرگەتيكا باسقارماسى, اۋدان اكىمدىكتەرى كۇنى-ءتۇنى جۇمىلدىرىلدى», – دەدى. ونىڭ ايتۋىنشا, كۇن سايىن قار تازالاۋ جۇمىستارىنا 760-تان استام  تەحنيكا مەن 1600-دەن استام جۇمىسشى جۇمىلدىرىلۋدا. «بۇعان قوسا, قوسىمشا قالا كاسىپورىندارىنىڭ 128 تەحنيكاسى مەن 5 مىڭعا دەيىن ادام تارتىلدى. ەڭ بىرىنشىدەن, جولداردى, الەۋمەتتىك-اكىمشىلىك نىسانداردى, ادامدار كوپ جينالاتىن اۋەجاي, ۆوكزال, ساۋدا ورتالىقتارى, بازارلار ماڭىن قاردان تازارتۋ شارالارى قولعا الىنۋدا», – دەدى قالا اكىمى. سونىمەن قاتار, ول قالا كولەمىنىڭ ۇلكەندىگىنە جانە ىرلەگەس جاقتان ەلدى مەكەندەردىڭ كوپتىگىنە بايلانىستى قاردى دالاعا شىعارۋ بارىسىندا قيىندىقتار تۋىنداپ وتىرعاندىعىن دا اتاپ ءوتتى. اكىمنىڭ سوزىنە سۇيەنسەك, الماتىعا سوڭعى 4 تاۋلىكتە 95 مىڭ تەكشە مەتر بولاتىن قار جاۋعان. بۇل وتكەن قىستا تۇسكەن قاردان الدەقايدا كوپ.