زياتكەرلىك مەنشىك سالاسىنداعى اكىمشىلىك كەدەرگىلەر ازايادى

قر ۇكىمەت وتىرىسىندا «زياتكەرلىك مەنشىك سالاسىنداعى زاڭنامانى جەتىلدىرۋ ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلاندى. زاڭ جوباسىن مەملەكەت باسشىسىنىڭ تاپسىرماسى اياسىندا زياتكەرلىك مەنشىك سالاسىنداعى ەىدۇ ستاندارتىنىڭ جۇيەسىنە كوشۋ بويىنشا ۆەدومستۆوارالىق جۇمىس توبى ازىرلەپ, زاڭنامانىڭ زياتكەرلىك مەنشىك سالاسىندا جاقسارتۋعا باعىتتالدى. اتاپ ايتقاندا, تاۋار بەلگىلەرى جانە ونەركاسىپتىك مەنشىك نىساندارى, سونداي-اق زياتكەرلىك مەنشىك سالاسىنداعى اكىمشىلىك كەدەرگىلەردىڭ ازايۋى. بارلىعى 12 زاڭنامالىق اكتىگە 188 وزگەرتۋلەر مەن تولىقتىرۋلار ەنگىزۋ ۇسىنىلدى. سونىمەن قاتار زاڭ جوباسىنداعى زياتكەرلىك مەنشىك سالاسىنداعى زاڭناماعا وزگەرتۋلەر مەن تولىقتىرۋلار ەنگىزۋ ماسەلەسى بويىنشا زياتكەرلىك مەنشىك سالاسىنىڭ نىساندارىن راسىمدەۋ مەن تىركەۋ جۇمىستارى «ءبىر تەرەزە» قاعيداسى ارقىلى جۇرگىزىلەدى. بۇل تۋرالى ادىلەت ءمينيسترى مارات بەكەتاەۆ ۇكىمەتتىڭ كەزەكتى وتىرىسىندا زياتكەرلىك مەنشىك سالاسىنداعى زاڭنامانى جەتىلدىرۋ بويىنشا وزگەرىستەر مەن تولىقتىرۋلار ەنگىزۋ ۇسىنعان زاڭ جوباسىندا باياندادى. بەلگىلى بولعانداي, قازىر قازاقستاندا وتىنىمدەردى جانە ساراپتامالاردى قابىلداۋ ساراپتاما ۇيىمدارىندا, زياتكەرلىك مەنشىك سالاسىنىڭ نىساندارىنا قۇقىقتى تىركەۋ ادىلەت مينيسترلىگىندە جۇرگىزىلەدى. ال مۇنداي جۇمىس ەىدۇ ەلدەرىندە, اتاپ ايتقاندا اقش, پورتۋگاليا, جاپونيا, شۆەيتساريا, گەرمانيا, قىتاي, وڭتۇستىك كورەيا ەلدەرىندە ءبىر ۆەدومستۆودا «ءبىر تەرەزە» قاعيداسى ارقىلى جۇزەگە اسىرىلادى. ايتا كەتەيىك, بۇل زاڭ جوباسى زياتكەرلىك مەنشىك سالاسىنداعى اكىمشىلىك كەدەرگىلەردى ازايتۋعا باعىتتالعان. ايان ءابدۋالي, "ەگەمەن قازاقستان".