بارىمىزدى باعالاي بىلەيىك

ەلباسىنىڭ « ۇلى دالا ۇلاعاتتارى» اتتى ەڭبەگىن «ەگەمەن قازاقستاندا» جاريالانىپ جۇرگەن ۇزىندىلەرىن ۇزبەي وقىپ كەلەمىن. ەل تاۋەلسىزدىگىنىڭ العاشقى جىلدارىنان ءار سالادا ورىن العان جاعدايلار جالپىلاما دەمەسەك, ءبارى بىردەي كوپشىلىكتىڭ ەسىندە ساقتالۋى قيىن. ال پرەزيدەنت سونىڭ ءبارىن ساناسىنا ءتۇيىپ, قويىن كىتاپشاسىنا ءتۇرتىپ وتىرعانداي تۇگەندەگەن ەكەن. ءبىر ادام سونىڭ ءبارىن قالاي ويلاپ, پايىمداپ, باسقارىپ وتىرادى ەكەن دەپ ەرىكسىز تاڭعالاسىڭ. نۇرسۇلتان ءابىش ۇلىنىڭ قاي ءسوزى دە كوكەيگە قونىمدى. ماعان, اسىرەسە, ول كىسىنىڭ ونەر سالاسىنا, رۋحاني قۇندىلىقتارىمىزعا قاتىستى ايتقان وي-تۇجىرىمدارى ەرەكشە اسەر ەتتى. «ەگەر ءبىز مەملەكەت بولىپ تۇرعىمىز كەلسە, ءوزىمىزدىڭ مەملەكەتتىگىمىزدى ۇزاق ۋاقىتقا مەڭزەپ قۇرعىمىز كەلسە, وندا حالىقتىڭ رۋحانياتىنىڭ باستاۋلارىن تۇسىنگەنىمىز ءجون», – دەيدى پرەزيدەنت. سوناۋ توقسانىنشى جىلدارداعى وتپەلى كەزەڭدەردە ونەر سالاسى وگەي بالانىڭ كۇيىن كەشكەنى جاسىرىن ەمەس. باسقاسىن ايتپاعاندا, ساحنالار قاڭىراپ, دارىندى جاندار بازار جاعالاپ كەتتى. بىراق سونىڭ وزىندە مەملەكەتىمىز مادەنيەت پەن ونەرگە قولداۋ كورسەتۋدىڭ امالدارىن تاۋىپ, باس كوتەرەر ازاماتتار رۋحاني دۇنيەلەردەن اجىراپ قالماۋىمىزعا دانەكەر بولدى. ەلباسى جازعانداي, قوعامنىڭ دەموكرا­تيالىق ۇردىستەرىن اۋەلگى كەزدە دابىرا داۋ-دامايعا, كەيىننەن سىپىرا ساياسي ساۋداگەرلىككە سالىپ, ودان سوڭ «بارا جاتقاننىڭ بالتاسىنا, كەلە جاتقاننىڭ كەتپەنىنە» جابىسۋمەن سىندارلى پىكىرتالاستىڭ سىنىن كەتىرىپ, شىرايىن بۇزعان كەزى دە بولدى. بىراق ونەر ءبىرجولا توقىراعان جوق. بارعان سايىن تىنىسى اشىلىپ, ءورىسى كەڭىپ, قازىر رۋحاني دۇنيەلەرىمىز ماقتانىشپەن ايتۋعا بولارلىقتاي دەڭگەيدە. رۋحاني جۇتاڭدىق قوعام بولمىسىن دا ازدىراتىنى اقيقات. «مەملەكەتتىڭ دامۋى – رۋحاني الەمىنىڭ دامۋىمەن تىكەلەي ساباقتاس. ادامنىڭ ەستەتي­كالىق جانە ەتيكالىق تالعامى قاتار وسكەن جاع­دايدا, ەلدىڭ دە زەردە-زەيىنى تولىعىپ, قوعام­نىڭ مورالدىق كەلبەتى كەمەلدەنە تۇسەدى. قوعامنىڭ تازا كوڭىلى وسى كەزدە ءوزىنىڭ بويىن­داعى تالعامنىڭ تالاپقا تولىقتاي جاۋاپ بە­رۋىنە جول اشىپ, ۇلتتىڭ ءوزىن ءوزى تانۋ جاع­دايى جاڭا بەلەس­تەرگە كوتەرىلەدى. زيالى قاۋىم­نىڭ ۋاقىت الدىنداعى جاۋاپكەرشىلىگى ارتىپ, ءما­دەنيەت قايراتكەرلەرىنىڭ ار تازالىعى مەن جان تا­زالىعى الدىڭعى ورىنعا شىعادى. ونەر سوندا قاناتىن كەڭگە جايادى», – دەپ جازىپتى نۇر­سۇلتان ءابىش ۇلى. اقيقاتى سول! ەڭ الدىمەن ادامنىڭ رۋحاني الەمى, جانى تازا بولۋى كەرەك. كەلەشەك ۇرپاقتى بيىك ادامگەر­شىلىك ۇعىمدارعا, كىسىلىك كەلبەتىن ساقتاي بىلۋگە ۇيرەتۋ قاجەت. مەملەكەت باسشىسى وسى ورايدا ونەردەگى جاس ۇرپاققا دا ءسوز ارناعان ەكەن. «ونەردە جۇرگەن جاس ورەن, ءور بول, بىراق كەڭ بول. ەڭ باستىسى, كىرشىكسىز تازا بول. ونەرگە وزىمشىلدىك تە, كۇندەستىك تە قاۋىپتى. جانىڭ جايدارى, جاراسىمىڭ يبالى بولسىن. ونەردەگى باسەكەلەستىك ىشتارلىق پەن قىزعانشاقتىققا بوي الدىرماسىن. مۇنداي دەرتتىڭ دە ونەر سالاسىندا كەزدەسىپ قالاتىنى شىندىق. وزساڭ – ونەرىڭمەن وز, تالانتىڭمەن تانىل, دارىنىڭمەن دارالان. قۇر ەلىكتەۋ مەن سەرگەلدەڭ سولىقتاۋدان ساق بول», – دەيدى ۇلت كوشباسشىسى. ونەر مەكتەپتەرىندە كور­نەك­تى تۇسقا جازىپ قوياتىن امانات ءسوز. ءوز ءما­دە­نيەتىمىز بەن ونەرىمىزگە, ۇلتتىق قۇندى­لىق­تارى­مىزعا ءوزىمىز, سوڭىمىزدان ەرگەن ۇرپاق­­تارىمىز قامقور, جاناشىر بولماساق, باسقا كىمگە كەرەك؟! بارىمىزدى باعالاي بىلەيىك تە. رىمبالا وماربەكوۆا, قازاقستاننىڭ ەڭبەك سىڭىرگەن قايراتكەرى, قاراعاندى