قازاقستان ەكسپورتتاۋشى 50 ەلدىڭ قاتارىندا

ورتالىق كوممۋنيكاتسيالار قىزمەتىندە وتاندىق برەندتەردى جاساپ, قولداۋعا ارنالعان ءباسپاسوز ءماسليحاتى ءوتتى. وعان ينۆەستيتسيالار جانە دامۋ مينيسترلىگىنىڭ يندۋستريالىق دامۋ جانە ونەركاسىپتىك قاۋىپسىزدىك كوميتەتى توراعاسىنىڭ ورىنباسارى تيمۋر نۇراشەۆ, «ساراپتامالىق ورتالىق» جشس باس ديرەكتورى قايرات سادۋاقاسوۆ پەن «Kaznext invest» اق-تىڭ ەكسپورتتى جىلجىتۋ دەپارتامەنتىنىڭ ديرەكتورى ايساۋلە سۇلتانمۇراتوۆا قاتىستى. بريفينگتە اتالعان كوميتەت ءتورا­عا­سىنىڭ ورىنباسارى وتاندىق برەندتتى جاساپ, ونى شەتەلگە ناسيحاتتاۋدا ات­قارىلىپ جاتقان جۇمىستار تۋرالى ايتىپ بەردى. ونىڭ ايتۋىنشا, قازىرگى كەزدە ەلىمىز 118 مەملەكەتكە تاۋاردىڭ 970 ءتۇرىن ساتۋمەن اينالىسىپ جاتىر. جىلىنا شامامەن 200 مىڭنان اسا وتاندىق ءونىم شەتەلگە ساتىلادى. – بۇگىندە ەلىمىزدە شەتەلگە وتاندىق ونىمدەردى شىعارۋمەن 1 800 ەكسپورتتاۋشى جۇمىس ىستەيدى. ولار تۇراقتى تۇردە 1 ملن اقش دوللارىنان استام پايدا ءتۇسىرىپ وتىر, – دەدى تيمۋر نۇراشەۆ. سونىمەن بىرگە, ول اۋىل شارۋاشىلىعى كەشەنىندە ەلىمىزدىڭ بەتكە ۇستار ماركالارىن جاساۋ ءۇشىن «Qazaq Organic Food», «حالال», «ەت برەندى» برەندتەرىنىڭ ءازىر­لەن­گەنىن ايتتى. «بۇل برەندتەر بەل­گىلى ءبىر نارىققا باعىتتالعان. بۇدان باس­قا ءبىز ەلىمىزدىڭ اتىن الەمگە تانىتۋ ءۇشىن 10 كومپانيانى ارنايى تاڭداپ الدىق. قازىرگى كەزدە ولاردىڭ ونىمدەرىنە جاقىن جانە الىس شەتەلدەر قىزىعۋشىلىق تانىتىپ جاتىر. مىسالى, ەلىمىزدىڭ ەت ونىمدەرى قىتاي, رەسەي, تاياۋ شىعىس پەن اۆستراليا سياقتى ەلدەردىڭ سۇرانىسىنا يە. ال اراب مەملەكەتتەرىن حالال ونىمدەرى قىزىقتىرادى. ارينە, اراب ەلدەرىنە ءبىز ارنايى تەكسەرۋدەن وتكەن ونىمدەردى جەتكىزەمىز», دەدى تيمۋر نۇراشەۆ. ءباسپاسوز ءماسليحاتىندا «ساراپ­تا­ما­لىق ورتالىق» جشس باس ديرەكتورى قايرات سادۋاقاسوۆ وتاندىق برەندتەردى جاساۋدىڭ ماڭىزدىلىعى تۋرالى ايتىپ بەردى. ول ەلىمىزدە جەڭىل جانە اۋىر ونەركاسىپتى دامىتۋ ءۇشىن برەندتەر جاساۋ كەرەكتىگىن, وسىنىڭ ءوزى الەمگە قازاقستاندىق ءونىمدى ناسيحاتتاۋدا جانە دامىتۋدا ماڭىزدى ءرول اتقاراتىنىن ايتتى. – قازىرگى تاڭدا قازاقستان ەكسپورتتاۋ­شى ءىرى 50 ەلدىڭ قاتارىنا كىرەدى. ەلىمىز تاۋەلسىزدىك العان كەزدەن بەرى شەتەلگە ۋران, ۇن, بيداي, مۇناي جانە باسقا دا ونىمدەردى شىعارۋمەن اينالىسۋدا. ال شيكى مۇناي مەن ەت ونىمدەرى جاقسى ساتىلىپ جاتىر. مىسالى, ءبىر قىتايدىڭ ءوزى جىل سايىن ەلىمىزدەن 800 000 توننا سيىر ەتىن السا, ەلىمىز شيكى مۇناي ساتۋمەن اينالىساتىن 10 مەملەكەتتىڭ قاتارىنا كىرەدى, – دەدى ول. قورىتا ايتقاندا, بريفينگكە قاتى­سۋ­شىلار وتاندىق برەندتى جاساۋدا جانە ونى قولداۋدا مەملەكەت تاراپىنان قولدا بار مۇمكىندىكتىڭ جاسالاتىنىن اتاپ ءوتتى. داستان كەنجالين, «ەگەمەن قازاقستان»