قولايلى نەسيە كوزى

«سىباعا» اۋىل شارۋاشىلىعى تاۋارلارىن وندىرۋشىلەر ءۇشىن ەڭ قولجەتىمدى نەسيەلەندىرۋ باعدار­لاماسىنىڭ ءبىرى. سونداي-اق, بۇل وسى باعىتتا ءوز بيزنەسىن اشۋعا نيەتتەنگەن, بىراق, مال شارۋاشىلىعى سالاسىنىڭ جۇمىسىندا تاجىريبەسى جوقتار ءۇشىن ءتيىمدى. بۇعان قوسىمشا, نەسيەلەندىرۋ جاعدايىن جاساۋ كەزىندە جەكەمەنشىك بيزنەستىڭ مۇددەسى مەن مۇمكىندىگى ەسەپكە الىندى. سىياقىنىڭ پايىزدىق دەڭگەيى دە تومەن. ياعني, 14 پايىزدىڭ جارتىسىن مەملەكەت سۋبسيديالايدى. ونىڭ ۇستىنە, قارىز تولتىرۋ جۇمىسى مەن جەڭىلدىك مەرزىمىن كەپىلدىكپەن قامتاماسىز ەتۋ تالابى دا قىسقارتىلعان. تاۋارلىق تابىننىڭ تۇقىمدىق ساپاسىن جاقسارتۋدى كوزدەيتىن باعدارلاماعا ار­شالى اۋدانىندا ايرىقشا قى­زىعۋشىلىق بايقالادى. ماسە­لەن, بيىلعى جىلى اۋداندا 5 شارۋاشىلىق باعدارلاماعا قاتىسسا, ەكى شارۋاشىلىق 53 ميلليون 250 مىڭ تەڭگە نەسيەنى راسىمدەدى. اۋىل شارۋاشىلىعى تاۋارلارىن وندىرۋشىلەر ەت باعىتىنداعى 162 ءىرى قارا ساتىپ الدى. اتاپ اي­تاتىن بولساق, «ۆ.سۋراەۆ» شارۋا قوجالىعى 63 ءىرى قارا, «ار­نۇر» جەكە كاسىپورنى 30 باس, «ميحايلوۆسكي» سەرىكتەستىگى 30 باس, «نارنۇر» جەكە كاسىپورنى 17 باس جانە ءبىر بۇقا, «عازەس» شارۋا قوجالىعى 20 باس ءىرى قارا جانە ءبىر بۇقا ساتىپ الدى. جۋىردا «دانا» شارۋا قوجالىعى مەن «قوجاحانوۆ» جەكە كاسىپورنى اسىل تۇقىمدى 259 ءىرى قارا مال ساتىپ الۋ قۇجاتتارىن دايىندادى. «ۆ.سۋراەۆ» شارۋا قوجا­لىعىنىڭ باسشىسى ۆيكتور سۋ­راەۆ­پەن تىلدەسكەنىمىزدە ول: «ما­عان اۋداندىق اۋىل شارۋا­شىلىعى ءبولىمىنىڭ قىزمەت­كەرلەرى, اسىرەسە, باس مامان مەڭ­گۇل ىبىراەۆا ءتيىستى قۇجات­تاردى دايىنداۋىما كومەك­تەستى. باعدارلامانىڭ ءاربىر تار­ماعىن جەتە ءتۇسىندىردى. اۋىل تۇر­عىن­دارىنىڭ كوبى نەسيە الۋعا ءجۇ­رەكسىنەدى. قيىنشىلىقتان قاش­پايتىن ادامدارعا مەملەكەت سۋبسيديالاۋ ارقىلى قولداۋ كورسەتىپ, جان-جاقتى كومەكتەسەتىنى قان­داي عانيبەت. مەملەكەتتىڭ قولداۋىن­سىز مال باسىن كوبەيتە الماس ەدىك. بۇل ۇلكەن ەڭبەك. «سىباعا» اۋىل ادامدارىن ۇلكەن ىستەرگە جىگەرلەندىرەدى».