الماتىعا اسپانمەن باراتىندار ازايعان

«اۋليەاتا» حالىقارالىق اۋەجايىنىڭ كەشەنى وتكەن جىلى عانا كۇردەلى جوندەۋدەن ءوتىپ, جولاۋ­شىلارعا جاڭا كەيىپتە قىزمەت ەتىپ جاتىر. ءتىر­كەۋ, تەكسەرۋ, باسقا دا قىزمەت ورىندارى زاما­ناۋي ۇلگىدە جابدىقتالعان. پوليتسيا, كەدەن, قاۋىپ­سىزدىك قىزمەتتەرىنىڭ الاڭسىز جۇمىس ىستەۋىنە دە بارلىق جاعداي جاسالىپتى. ۇشۋ, ۇشىپ كەلۋ, «VIP», جالپى زالداردا جولاۋشىلارعا ءمىنسىز قىزمەت كورسەتىلەدى. مەيرامحانا, دۇكەن, گازەت-جۋرنال ساتاتىن ورىن, ويىن الاڭى, انا مەن بالا بولمەسى, مەدپۋنكت, ءدارىحانا, جۇك ساقتايتىن, اقشا ايىرباستايتىن ورىندار, ءتىپتى بانكوماتقا دەيىن بار. مۇنداعى اتاۋلار دا, باعىت بىلدىرەتىن جازۋلار دا قازاق, ورىس جانە اعىلشىن تىلدەرىندە جازىلعان. اۋەجاي حالىقارالىق تالاپتارعا ساي. جولاۋشىلار تەرمينالىنىڭ جالپى كولەمى 6800 شارشى مەتردى قۇراسا, ساعاتىنا 600 جولاۋشى قابىلداپ, ءبىر ساعاتتا – 3, ءبىر جىلدا 6500 رەيستى جۇزەگە اسىرادى. «اۋليەاتا» اق باسقارما توراعاسىنىڭ ورىنباسارى اناتولي نەستەرەنكونىڭ ايتۋىنا قاراعاندا, «باتىس ەۋروپا-باتىس قىتاي» حالىق­ارالىق كولىك ءدالىزى پايدالانۋعا بەرىلگەلى بەرى تارازدان الماتىعا ۇشاتىن جولاۋشىلاردىڭ سانى كۇرت ازايىپ كەتىپتى. اقىرىندا بۇل رەيستى جابۋعا ءماجبۇر بولعان. ويتكەنى, تاراز بەن الماتىنىڭ اراسى 500 شاقىرىمنان ءسال-اق استام. جۇيىتكىگەن كولىكتەر كونە قالادان وڭتۇستىك استاناعا 4-5 ساعاتتا جەتىپ بارادى. ءارى تاكسي باعاسى دا ۇشاقتىڭ بيلەتىنىڭ قۇنىنا قاراعاندا مۇلدەم ارزان. دەگەنمەن, اۋەجاي باسشىلىعى اۋليەاتا­دان الماتىعا جاڭا رەيس اشۋدىڭ باسقا جولدارىن قاراستىرىپ جاتىر ەكەن. بۇگىندە اۋەجايدان SCAT كومپانياسىنىڭ ۇشاقتارى ىشكى باعىت بويىنشا استاناعا اپتاسىنا ءتورت رەت ۇشسا, «Air Astana» كومپانياسىنىڭ ۇشاقتارى ءۇش رەت, ال حالىقارالىق باعىتتا SCAT كومپانياسىنىڭ ۇشاقتارى ماسكەۋگە, حۋدجاندقا اپتاسىنا ەكى رەت, سۋرگۋتكە ءبىر رەت ۇشادى. الداعى ۋاقىتتا ىشكى باعىتتا اقتاۋ, اتىراۋ قالالارىنا جانە حالىقارالىق – سانكت-پەتەربۋرگ, نيجنەۆارتوۆسك, تۇمەن, ىستانبۇل, ءۇرىمشى جانە دۋباي باعىتىندا جولاۋشىلار ۇشاعىن ۇشىرۋ جوسپارلانىپ وتىر. ورالحان ءداۋىت, «ەگەمەن قازاقستان» تاراز