اقىن مەن جىرشى مۇراتى

ەلورداداعى «تىلەپ» قوبىز سارايىندا استانا قالاسى تىلدەردى دامىتۋ باسقارماسىنىڭ ۇيىمداستىرۋىمەن ەل تاۋەلسىزدىگىنىڭ 25 جىل­دىعىنا ارنالعان «ماڭگىلىك ەل – مۇراتىم» اتتى جاس اقىندار ءمۇشايراسى مەن «ازاتتىق ءۇنى» دەگەن تاقىرىپتا جىرشى-تەرمەشىلەر بايقاۋى ءوتتى. شارت بويىنشا ءمۇشايرا مەن بايقاۋعا 16-30 جاس ارالىعىنداعى ۇمىتكەرلەر قاتىستى. «تىلەپ» قوبىز سارايىندا وتكەن كەشكە سول ۇمىتكەرلەر اراسىنان تاڭداپ الىنىپ, الدىن الا ىرىكتەلگەن جاستار تاۋەلسىزدىككە ارنالعان جانە ەركىن تاقىرىپتاعى ولەڭدەرىن وقىپ, جىر-تەرمەلەرىن ورىندادى. شارا بارىسىندا ءمۇشايرا مەن بايقاۋدىڭ قورىتىندىسى قاتار جاريالاندى. سونىمەن, جاس اقىنداردىڭ ءمۇشايراسىنىڭ قورىتىندىسى بويىنشا ءبىرىنشى ورىن جۇلدىزاي ىسقاقتىڭ, ەكىنشى ورىن سۇلۋجان تابىلدى جانە ەلدوس انكەي ەسىمدى جاستاردىڭ ەنشىسىنە بۇيىرسا, ءۇشىنشى ورىنعا تىلەن توبىقباي مەن بەكمۇرات ومىربەك لايىقتى دەپ تانىلدى. ال جىرشى-تەرمەشىلەر بايقاۋىندا ءبىرىنشى ورىندى نۇربەك سانسىزباەۆ, ەكىنشى ورىندى فەرۋزا وڭتالاپ, ءۇشىنشى ورىندى راحات بەكاسىلوۆ جەڭىپ الدى. ايتا كەتەيىك, جىر دوداسىنىڭ قازىلار القاسىنىڭ قۇرامىندا بەلگىلى ادەبيەتشى ءىلياس رىسبەك ۇلى, «شابىت» حالىقارالىق جاستار فەستيۆالىنىڭ لاۋرەاتى, اقىن اسىلزات ارىستانبەك جانە «دارىن» جاس­تار سىيلىعىنىڭ لاۋرەاتى, اقىن قالقامان سارين بولدى. سونداي-اق, جىراۋ, پروفەسسور اماندىق كومەك ۇلى,  مادەنيەت قايراتكەرى, بەلگىلى ءانشى كلارا تولەنباەۆا جانە اقىن, «ابايتانۋ» ورتالىعىنىڭ ديرەكتورى الماحان مۇحامەتقاليقىزى جىرشى-تەرمەشىلەر بايقاۋىنا قازىلىق ەتتى. ايگۇل سەيىلوۆا, «ەگەمەن قازاقستان»